DILI, 10 agostu 2023 (TATOLI)—Ministra Solidariedade Sosiál no Inkluzaun (MSSI), Verónica das Dores, kuarta ne’e, formalmente anúnsia ba públiku katak pagamentu pensaun sosiál ba ferik no katuas no ema ho defisiénsia sira hamutuk 99,564, Instituisaun Nasional Seguransa Sosiál (INSS) sei implementa simultaneamente iha munisípiu hotu-hotu iha teritóriu nasionál, iha 14 agostu.
Notísia Relevante: “PR promulga programa IX Governu mak realiza pagamentu ba idozu-Invalidéz”
Dekretu-Lei númeru 53/2022 hateten, pensaun sosiál ba ferik no katuas no maluk ho defisiénsia sira, sei hetan pagamentu ho montante $57 ba kada ema ida iha kada fulan.
“Agora ita halo pagamentu ba faze primeiru nian, ba fulan neen (6) uluk. Totál benefisiáriu sira hamutuk 99,564 iha munisípiu 12 no mós RAEOA,” Ministra Solidariedade Sosiál no Inkluzaun (MSSI), Verónica das Dores MSSI, Verónica das Dores, hateten liuhosi komunikadu ne’ebé Agência Tatoli asesu, kinta ne’e.
Ba tinan 2023 ne’e, pagamentu premeira faze tuir lolos akontese iha jullu 2023, maibé pagamentu ne’e foin bele realiza iha agostu 2023 tanba iha readjustamentu dadus benefisiáriu ba tinan ida-ne’e nian.
MSSI simu tiha ona korespondénsia hosi Banku Nasionál Komérsiu Timor-Leste (BNCTL) hodi loke pagamentu pensaun sosiál ba ferik, katuas no maluk defisiénsia sira iha 14 agostu 2023 iha sede suku sira iha munisípiu hotu.
Prosesu ne’e sei hetan asisténsia no apoiu másimu hosi Instituisaun Nasional Seguransa Sosiál (INSS) ho MSSI.
“Ami hakarak konvida benefisiáriu sira hotu ne ebé prienxe ona rekezitu sira atu hakbesik ba fatin designadu ba pagamentu ne’e, labele haluha lori mós kartaun identidade ne’ebé deside ona hodi hafasil prosesu pagamentu sira-ne’e. Ekipa pagamentu mós sei tulun benefisiáriu hirak-ne’ebé labele hakat mai fatin pagamentu, hodi bele hetan sira-nia osan ne’e,” nia hateten.
Maibé ba poupansa Banco Mandiri, Banku Repúblika Indonézia (BRI) no Banku Nasionál Ultramarino (BNU), sira bele halo levantamentu liuhosi konta bankária.
Entretantu, sira-ne’ebé seidauk iha konta bankária ne’e, pagamentu sei selu direta ba benefisiáriu sira iha sira-nia suku.
Jornalista : Osória Marques
Editór : Cancio Ximenes
