DILI, 11 agostu 2023 (TATOLI) – Polísia Nasionál Timor-Leste (PNTL), eskuadra Dom Aleixo hamutuk ho servisu Intelijénsia Makikit Muisípiu Díli, asegura joven na’in-tolu ne’ebé envolve kazu abuzu seksuál.
Joven na’in-tolu ne’e ho insiál JADS, tinan 20 ICBDS tinan 16 no JNG tinan 14, PNTL asegura, tanba envolve iha kazu abuzu seksuál hasoru minoridade ho inisiál NXL tinan 15, iha loron tersa (8/8) maizmenus iha oras tuku 2:00 madrugada iha área Beto Lafaek, Aldeia Rosario, Suku Madohi, Postu Administrativu Dom-Aleixo, Muisípiu Dili.
“Bainhira ekipa konjunta asegura joven na’in-tolu ne’e halo uluk esplikasaun ba família relasiona ho krime ne’ebé sira komete. Nune’e konvense parte família sira no família hosi joven na’in-tolu ne’e koopera di’ak ho autoridade polisiál hodi la mosu dezentendementu entre família ho autoridade seguransa”, hateten liuhosi komunikadu ne’ebé TATOLI asesu, sesta ne’e.
Hafoin ne’e, ekipa konjunta transporta no entrega kedas joven sira refere ne’e ba iha Vulnerable Person Unit (VPU) ne’ebé tutela ba Servisu Investigasaun Kriminál Muisípiu Díli, hodi halo prosesu investigasaun, nune’e bele hatene motivu hosi akontesementu ne’e.
Jornalista: Natalino Costa
Editór : Zezito Silva
