iklan

NASIONÁL, POLÍTIKA

Governu halo levantamentu ba UNP Ainaro atu konstrui hikas

Governu halo levantamentu ba UNP Ainaro atu konstrui hikas

Uma Naroman ba Povu (UNP) ne’ebé hetan estragu hosi dezastre naturál iha Ainaro. Imajen/Espesiál.

DILI, 14 agostu 2023 (TATOLI)–Ministru Administrasaun Estatál (MAE), Tomas Cabral, hateten Uma Naroman ba Povu (UNP) iha munisípiu Ainaro ne’ebé nakfera no monu tanba inundasaun ne’e, Governu presiza halo levantamentu hafoin kontinua halo konstrusaun.

Notísia Relevante: UNP naksobu kauza hosi dezastre naturál iha prosesu investigasaun laran

“Ita la’ós haforsa maibé halo levantamentu no haree fali nia kustu loloos, nune’e konstrusaun komesa fali iha tinan oin. Ita haree programa di’ak maibé nia implementasaun ne’e mak ladi’ak. Tanba ne’e, Uma Naroman ba Povu iha Ainaro ne’e nakfera kauza hosi inundasaun ne’e sei kontinua fali iha tinan oin. Entaun liuhusi levantamentu mak sei hatene kustu loloos ba uma ida, mak foin bele hahú fali,” Tomas Cabral hateten ba Agencia Tatoli, iha edifísiu MAE Colmera, segunda ne’e.

Kona-ba kondisaun hosi UNPN, nia dehan, konstrusaun balun la forte tanba ezemplu mak hanesan iha Ainaro, uma balun aat tanba udan ne’e, aAgora iha prosesu levantamentu no ekipa MAE iha terenu buka hatene hodi hadi’a.

Programa UNP mai hosi VIII Governu konstitusionál, nune’e IX Governu Konstitusionál sei kontinua programa ne’e maibé sei halo tan levantamentu ba kondisaun sira tanba konstrusaun uma sira seidauk atinje alvu ba uma rihun 65 iha territóriu tomak, no konstrusaun iha tinan 2022 mós seidauk hotu tanba prosesu sei iha kámara de kontas.

“Sekretáriu Estadu ho Vise Ministru Administrasaun Estatál atu buka hatene, hodi ita hadi’a tiha. Nuna’e, kontratór ne’ebé halo ne’e tenke kuidadu tanba uma Ainaro ne’e sinta ho rai leten laiha mak monu no nakloke ba rua ne’e. Se ema toba iha laran mak nia sei sai problema boot ida,” nia dehan.

Notísia Relevante: Claudinha: “Ami prontu konstrui fali UNP ne’ebé aat tanba dezastre naturál”

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!