DILI, 15 agostu 2023 (TATOLI) – Diretór-Ezekutivu Centro Nacional Chega (CNC), Hugo Fernandes, sujere ba Ministériu Edukasaun atu disponibiliza formasaun ba manorin sira sobre jestaun biblioteka.
Rekomendasaun ne’e mosu bainhira CNC simu lista eskola hamutuk 20 ne’ebé iha ona kondisaun mínima hodi instala biblioteka, maibé despois de observa balun seidauk halo jestaun di’ak.
CNC kria programa ida hodi bá halo observasaun hodi haree progresu sira ne’ebé maka eskola sira halo ona relasiona ho instalasaun biblioteka eskolár. Hafoin halo observasaun ba eskola 20 iha kapitál, haree katak balun laiha jestaun di’ak ba biblioteka. Tanba ne’e Chega husu atu iha profesór ida mak jere biblioteka hafoin partisipa tiha formasaun espesífika sobre ida ne’e.
“Ami-nian monitorizasaun ne’e identifika husi eskola 20 ne’e la’ós hotu-hotu iha kondisaun mínima. Eskola balun bainhira ami to’o iha ne’ebá la haree hetan fasilidade sira ne’ebé atu apoia biblioteka ne’e rasik. Balun laiha armáriu no meza, entaun livru sira tau de’it iha rai, balun iha plástiku laran. Profesór no estudante sira la uza materiál sira ne’e”, Hugo Fernandes hatete.
Husi estabelesimentu eskolár 20 ne’ebé CNC halo ona observasaun no iha jestaun di’ak mak Eskola 04 Setembru Balide, Cristal, Externato São José no São Miguel tanba instala ona biblioteka eskolár iha kada sala aula.
Diretór-Ezekutivu ne’e rekomenda katak eskola sira ne’ebé hetan ona observasaun husi Chega ne’ebé laiha kondisaun presiza duni partisipa formasaun adekuada hodi bele jere no kria fali biblioteka eskolár iha sala aula sira atu ajuda alunu no profesór sira iha prosesu aprendizajen.
Ministra Edukasaun, Dulce de Jesus, admite katak eskola hotu iha territóriu nasionál seidauk iha biblioteka própria ida atu rai livru ne’ebé Ministériu Edukasaun no parseiru dezenvolvimentu sira fornese.
Governante ne’e reforsa katak hanoin di’ak ne’ebé maka Chega hato’o ne’e pertinente, nune’e bele tulun eskola sira atu hatene utiliza espasu iha sala aula laran ba atividade ensinu. Chega nia hanoin atu fó formasaun ba profesór própriu hodi jere biblioteka ne’e di’ak, tanba Chega rasik iha koñesimentu di’ak ba asuntu ne’e.
Ministériu Edukasaun no CNC identifika ona eskola balun husi ensinu báziku primeiru no segundu siklu atu uza espasu iha aula laran hodi tau livru sira hanesan istória ba estudante no ba profesór sira, nune’e bainhira iha dixiplina istória bele uza hodi aprende.
Rekorde katak Diretór-Jerál Administrasaun no Finansa, Antoninho Pires, antes ne’e dehan ona katak Ministériu Edukasaun seidauk kria sala própria ba biblioteka, maibé foku liubá estabelesimentu sala de aula ba eskola sira tanba seidauk sufisiente.
“Ami tau prioridade ba konstrui no reabilita sala de aula iha eskola sira, tanba durante ne’e eskola 1.800 halerik de’it ba edifísiu no sala de aula, nune’e maka ministériu kria planu hodi konstrui”, Antoninho Pires relata foin lalais ne’e.
Notísia relasionada: MEJD seidauk kria sala própria ba estabelesimentu biblioteka iha eskola sira
Jornalista: Tomé Amado
Editora: Maria Auxiliadora
