COVALIMA, 15 agostu 2023 (TATOLI)–Governu liuhosi Banku Nasionál Komérsiu Timor-Leste (BNCTL, sigla portugés) finaliza ona pagamentu subsídiu ba idozu no invalidéz hamutuk 284 ba faze dahuluk tinan 2023 iha suku Suai Loro, postu administrativu Suai, munisípiu Covalima.
Notísia Relevante: INSS sei halo pagamentu ba idozu-invalidéz 99,564 iha 14 agostu
“Tuir dadus, benefisiáriu idozu no invalidéz iha suku Suai Loro hamutuk 342. Maibé, hosi númeru ne’e benefisiáriu idozu no invalidéz na’in-284 simu ona sira-nia direitu ne’ebé kada benefisiáriu simu osan $342.00. benefsiáriu na’in 20-resin seidauk simu, ho razaun tanba moras,” Xefe suku Suai Loro, Martinho Mendonça, hateten ba Agência Tatoli iha resintu AMC, Sukaer Laran, tersa ne’e.
Entertantu, tuir dadus ne’ebé jornalista Agência Tatoli asesu ne’e, totál benefisiáriu idozu no invalidéz iha Covalima mai husi postu administrativu hitu (7) ne’e hamutuk 6,218.
Hosi postu administrativu Suai ne’e iha benefisiáriu idozu no invalidéz mai hosi suku lima (5) hamutuk 1,761, postu Tilomar benefisiáriu mai hosi suku haat (4) hamutuk 773, postu Muacatar benefisiáriu mai hosi suku haat (4) ne’e hamutuk 936.
Benefisiáriu hosi postun administrative Fohorem ne’e mai hosi suku haat (4) hamutuk 504, postu Fatumea mai hosi suku tolu (3) ne’e hamutuk 474, postu Fatululik mai hosi suku rua (2) ne’e hamutuk 217 no benefisiariu hosi postu administrativu Zumalai ne’ebé mai hosi suku ualu (8) ne’e hamutuk 1603.
Bazeia ba kalendáriu, pagamentu ba benefisiáriu idozu no invalidéz iha postu Suai ne’ebé hahú iha suku Suai Loro iha 14 to’o loron 21 fulan-agostu, Tilomar hala’o iha 22 to’o loron 25 fulan-agostu, pagamentu ba benefisiáriu iha postu Maucatar hahú iha loron 28 fulan-agusto to’o loron 01 fulan-setembru.
Pagamentu ba benefisiáriu sira iha postu administrative Fohorem hahú iha loron 04 to’o 07 fulan-setembru, postu Fatumea hahú iha 11 to’o 13 fulan-setembru, postuFatululik hahú iha 18 to’o 19 fulan-setembru no postu Zumalai hahú iha loron 20 fulan-setembru to’o 02 fulan-outubru tinan 2023.
Jornalista : Celestina Teles
Editór : Cancio Ximenes
