DILI, 15 agostu 2023 (TATOLI)—Parlamentu Nasionál (PN), tersa ne’e, liuhosi komisaun espesializada sira hahú hala’o audiénsia públika ba proposta-lei Orsamentu Retifikativu (OR) 2023.
Notísia Relevante: 21 agostu: PN-Governu sei realiza debate proposta Orsamentu Retifikativu 2023
Tuir ajenda ne’ebé Agência Tatoli asesu hosi PN katak, komisaun espesializada hosi A to’o G sei hala’o audiénsia públika hamutuk iha sala plenária ho entidade sira hanesan Banku Sentrál Timor-Leste (BCTL), Prezidente Autoridade Rejiaun Administrativa Oé-Cusse Ambeno (RAEOA) ho Ministériu Solidariedade Sosiál no Inkluzaun (MSSI).
Tuir kalendáriu PN audiénsia públika ne’e sei hala’o durante loron 15 to’o 17 fulan-agostu hodi konvida mós entidade sira seluk.
Hafoin ne’e iha loron 21 fulan-agostu, PN ho Governu sei kontinua hahú debate proposta OR iha faze jeneralidade no iha 22-23 agostu kontinua debate espesialidade no 24 agostu aprovasaun iha finál globál, hafoin ne’e iha 26 agostu komisaun C trata asuntu Finansa Públika halo redasaun finál hodi envia ba Prezidente Repúblika atu bele promulga tuir kompeténsia eskluziva Xefe Estadu nian.
Iha reuniaun plenária 14 agostu 2023 aprova ona projetu deliberasaun debate ho karáter urjénsia ba proposta-lei númeru 15/2022, 21 dezembru, Orsamentu Jerál Estadu (OJE) ba 2023.
Aleinde iha proposta OR ne’e, Governu aprezenta alterasaun lei númeru 2/2022, 10 fevereiru, Enkuadramentu Orsamentál Jerál Estadu no Jestaun Finansa Públika no alterasaun daruak lei númeru 8/2008, 30 juñu lei Tributária, ne’ebé sei debate ho karáter urjénsia.
Proposta OR ne’ebé aprezenta ho montante biliaun $1.9 ne’e ho karáter urjénsia tuir planu no nesesidade ne’ebé Governu define.
Entretantu, iha 10 agostu 2023, IX Governu Konstitusionál aprezenta ona proposta Orsamentu Retifikativu (OR) ba Parlamentu Nasionál.
Notísia Relevante: PN aprova projetu deliberasaun debate OR ho karáter urjénsia
Jornalista : Nelson de Sousa
Editór : Cancio Ximenes
