VIQUEQUE, 16 agostu 2023 (TATOLI)—Ekipa hosi Sekretaria Estadu Formasaun Profisionál no Empregu (SEFOPE), kuarta ne’e, halo konsultasaun ba esbosu lei kontra violénsia no asédiu iha mundu traballu ba autoridade no empreza lokál sira iha munisípiu Viqueque.
“Konsultasaun esbosu ne’e ami halo iha nasionál hotu ona, nune’e ohin ami hahú fali iha munisípiu Viqueque tanba ita hanoin katak Governu nia planu refenaria iha Beaço no empreza barak mak sei investe iha Viqueque. Tanba ne’e presiza sosializa esbosu lei ne’e,” Diretór Nasionál Relasaun Traballu hosi SEFOPE, Jacinto Barros Gusmão, hateten ba Agência Tatoli, iha salaun administraun munisípiu Viqueque, kuarta ne’e.
Inisiativa hamosu esbosu hosi Konsellu Nasionál Traballu SEFOPE, ne’ebé ikus mai SEFOPE hamutuk ho International Labour Organization (ILO) kolabora hodi halo ativdade.
“Lei ne’e atu aplika ba setór privadu no setór públiku tanba presiza halo protesaun no kontra violénsia no asédiu iha mundu traballu, liu-liu iha fatin serbisu sira. Tanba ita hatene katak empregadór ne’e ema osan na’in no traballadór ema sira ne’ebé iha skill, maibé iha serbisu fatin dala ruma mosu tentasaun oin-oin, ho ida-ne’e ita kria lei hodi prevene. Liuhosi konsultasaun ne’e ita atu hariku liután esbosu ida-ne’e no tuir duni empredór no traballadór sira-nia hakarak hodi aplika iha Timor Leste,” nia akresenta.
Notísia relevante : KFP disemina informasaun promove integridade hapara asédiu seksuál iha mundu traballu
Esbosu lei kontra violénsia no asédiu iha mundu traballu adota padaraun internasionál ILO hosi konvesaun 190 nian.
“Maibé tenke kondís ho Timor Leste nian, tanba ne’e maka presiza ema hotu-hotu nia partisipasaun hodi fó opiniaun ba esbosu ida-ne’e,” nia tenik.
Atividade ne’e sei kontinua realiza iha munisipiu haat, nune’e hafoin ramata, SEFOPE sei kompleta esbosu ida-ne’e iha fulan outubru no sei aprezenta ba Ministériu Koordenadór Asuntu Ekonómiku hodi lori ba konsellu Ministru halo aprovasaun. Esbosu lei ne’e iha kapítulu hamutuk neen no artigu 33.
Iha fatin hanesan, Sekretáriu munisípiu Viqueque, Teotonio Sarmento da Silva, rekoñese lei ne’e sensitivu tanba ko’alia kona-ba empregadór no traballadór dala barak sempre uza sala iha fatin serbisu.
“Nune’e presiza lei ida hodi asegura no proteje entre empregadór no traballadór. Bainhira lei fraku maka sei hamosu asédiu no violénsia. Tanba ne’e ita hotu presiza fó hanoin di’ak ba esbosu lei ne’e nune’e iha futuru ita bele implementa iha Timor-Leste,” Diretór argumenta.
Atividade ne’e partisipa hosi Administradór postu lima, funsionáriu públiku no traballadór hosi empreza privadu sira iha munisípiu Viqueque.
Jornalista : Vitorino Lopes da Costa
Editora : Julia Chatarina
