PPN delega Vise Prezidente lidera meza ba debate proposta OR 2023

DILI, 18 agostu 2023 (TATOLI)—Prezidente Parlamentu Nasionál (PN), Maria Fernanda Lay, hateten sei delega kompeténsia ba nia Vise Prezidente hodi lidera meza ba debate proposta Orsamentu Retifikativu (OR) 2023.
Notísia Relevante: Debate proposta OR 2023 muda fali ba 22 agostu
“Sei iha Vise Prezidente Parlamentu Nasionál, nune’e substitui ha’u-nia auzénsia,” Prezidente PN ne’e hateten ba jornalista sira iha uma fukun PN, sesta ne’e.
Tuir kalendáriu debate proposta OR faze jeneralidade sei hahú fali iha 22 agostu, no 23-24 espesialidade no votasaun finál globál.
Tuir ajenda, iha loron 21 agostu, Prezidente Parlamentu Nasionál, Maria Ferenanda Lay, ho delegasaun sei dezloka ba rai-li’ur.
Prezidente Parlamentu Nasionál, Maria Fernanda Lay, sei reprezenta Prezidente Repúblika (PR), José Ramos Horta, iha simeira Xefe Estadu Komunidade Nasaun Ko’alia Lian Portugés (CPLP, siglá portugés) ne’ebé sei realiza iha São Tome e Principe iha 27 agostu tinan 2023.
“Laiha problema, Orsamentu Retifikativu só para ajusta de’it, la’ós Orsamentu Jerál Estadu.Maibé, iha kazu urjénsia atu substitui Xefe Estadu hanesan ita-boot sira hatene tiha ona, hakarak ka lakohi ha’u labele rekuza,” nia hateten.
PPN reprezenta Prezidente Repúblika ne’ebé ba partisipa simeira CPLP no sei hato’o mós diskursu Xefe Estadu nian, no PR labele partisipa hodi delega de’it Preizente PN, tanba iha ajenda importante seluk.
Notísia Relevante: PPN sei reprezenta PR partisipa simeira CPLP iha São Tome e Principe
Jornalista : Nelson de Sousa
Editór : Cancio Ximenes

