DILI, 18 Agostu 2023 (TATOLI) – Prezidente Komisaun Nasionál ba Eleisaun (CNE, sigla portugés), José Belo, hatete subvensaun públika ba kandidatu Prezidensia Repúblika na’in-rua ne’ebé hakat ba segunda volta iha kampaña eleitorál 2022 hamutuk millaun $2,5.
Rezultadu finál husi eleisaun prezidensiál daruak hatudu kandidatu Prezidente Repúblika, José Ramos Horta, hetan votu 397.145 (62.9%) ne’ebé sei hetan subvensaun millaun $1,6 no Francisco Guterres ‘Lu Olo’ ho votu 242,440 (37.9%) no sei simu subsídiu $969.760.
“Komisaun Nasionál ba Eleisaun seidauk selu subsídiu públiku ba kandidatu na’in-rua ba Prezidente Republika. Na’in-rua ne’e sei simu sira-nian direitu tuir estabelesimentu. Ida-idak iha direitu atu simu subsídiu husi Estadu ba kampaña eleitorál ho montante dólar amerikanu $4.00 ba kada votu ne’ebé hetan”, Prezidente CNE dehan ba Tatoli via telefone.
Lembra katak Governu aprova, iha kuarta ne’e, projetu dekretu-lei ne’ebé aprezenta hosi Primeiru-Ministru, Kay Rala Xanana Gusmão, ba alterasaun daruak dekretu-lei númeru 6/2018, loron 14 marsu, hodi fiksa valór subvensaun hosi Estadu ba kandidatu Prezidénsia Repúblika ba Eleisaun Prezidensiál iha tinan 2022 liubá.
Tuir dokumentu Governu, objetivu alterasaun ne’e atu permite fó kompensasaun ba kandidatu Prezidénsia Repúblika iha situasaun sira ne’ebé maka presiza realiza votasaun ba daruak nian, iha ámbitu Eleisaun Prezidensiál ne’ebé hanesan no determina valór subvensaun ne’ebé atu selu ba kada kandidatu tuir totál votu ne’ebé sira hetan ona.
Eleisaun Prezidensiál iha ronda dahuluk hala’o iha loron 19 marsu 2022, ne’ebé kompete hosi kandidatu hamutuk na’in-16, maibé ikus mai laiha ida mak manán maioria, nune’e avansa ba ronda daruak ne’ebé kompete hosi kandidatu Prezidénsia Repúblika, Francisco Guterres ‘Lú Olo’ no José Ramos Horta, ne’ebé realiza iha loron 19 abríl 2022.
Notísia relevante: Governu altera dekretu-lei fiksa valór subvensaun ba kandidatu Prezidénsia Repúblika
Jornalista: Osória Marques
Editora: Maria Auxiliadora