DILI, 16 agostu 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova ona projetu dekretu-lei ne’ebé aprezenta hosi Primeiru-Ministru, Kay Rala Xanana Gusmão, ba alterasaun daruak dekretu-lei númeru 6/2018, loron 14 marsu, hodi fiksa valór subvensaun hosi Estadu ba kandidatu Prezidénsia Repúblika ba Eleisaun Prezidensiál iha tinan 2022 liubá.
“Objetivu alterasaun ne’e atu permite fó kompensasaun ba kandidatu Prezidénsia Repúblika iha situasaun sira ne’ebé maka presiza realiza votasaun ba daruak nian, iha ámbitu Eleisaun Prezidensiál ne’ebé hanesan no determina valór subvensaun ne’ebé atu selu ba kada kandidatu ba realizasaun votasaun daruak nian sei selu ba kandidatu ida-idak ne’ebé partisipa iha votasaun daruak sei selu tuir totál votu ne’ebé sira hetan ona iha votasaun daruak,” Ministru Prezidénsia Konsellu Ministru, Agio Pereira, informa hafoin reuniaun ezekutivu, iha Palásiu Governu.
Notísia relevante : Eleisaun Prezidensiál Horta lidera provizóriu
Eleisaun Prezidensiál iha ronde dahuluk hala’o iha loron 19 marsu 2022, ne’ebé kompete hosi kandidatu hamutuk na’in-16, maibé ikus mai laiha ida mak manán maioria, nune’e avansa ba ronde daruak ne’ebé kompete hosi kandidatu Prezidénsia Repúblika, Francisco Guterres ‘Lú Olo’ no José Ramos Horta, ne’ebé realiza iha loron 19 abríl 2022.
Rezultadu ikus Eleisaun Prezidensiál hatudu katak kandidatu ho númeru sorteiu 01, José Ramos Horta ho votu 397.145 (62,09 %) no kandidatu ho númeru sorteiu 02, Francisco Guterres Lú Olo ho votu 242.440 (37,91%).
Jornalista : Antónia Gusmão
Editora : Julia Chatarina
