DILI, 19 agustu 2023 (TATOLI)-Xefe Estadu Maiór Jenerál Falintil-Forsa Defeza Timor-Leste (F-FDTL), Domingos Raul ‘Falur Rate Laek’ Komandu F-FDTL fó ona sansaun disiplinar ba membru sira ne’ebé envolve kazu Liquiça.
“Membru hirak ne’e submete ona ba prosesu investigasaun, horseik sira halo ona relatoriu balun ba, ha’u aprova ona para sira parte justisa prosesa tuir prosedimentu legál ne’ebé mak iha. Agora daudaun prosesu disiplinar la’o ona,” Tenente Jenerál Falur hateten ba jornalista sira hafoin karik Ai-funan hodi fó onra ba martír sira iha Semitériu Jardin Herois da Patria Metinaro, sábadu ne’e.
Nia dehan, aktus ne’ebé membru F-FDTL sira halo iha momentu ne’ebá ne’e implika sira lubuk ida tanba membru ne’ebé destaka iha Munisípiu Liquiça iha Postu ida mak koloka iha ne’ebá.
“Tanba ne’e depende ba investigasaun ka inkeritu, sé mak akuzadu, sé mak envolvidu, liuliu Komandante ne’ebé Komandanda membru sira iha fatin ne’ebá sei Komanda ka deskomandu; ne’e depende ba prosesu investigasaun mak sei haree ida ne’e,” nia dehan.
Antes ne’e, Komandu F-FDTL liuhosi Unidade Polísia Militar (PM) Detein ona membru F-FDTL nain haat ne’ebé envolve iha kazu tiru kanek Joven ida, Silvio da Costa Araújo idade 15 área Kalora, Aldeia Leopa, Suku Dato, Postu Administrativu Liquiça Vila, Munisipiu Liquiça.
Kazu ne’e akontese tanba deskonfia oknum F-FDTL tiru joven ida naran Silvio da Costa Araújo idade 15, tanba mosu konfrontu entre joven ho joven iha festa halo tinan, depois membru F-FDTL ho inisial EdC tama iha festa ne’e hodi buka joven sira ne’ebé envolve iha konfrontu ne’e, depois joven sira tuku kona membru F-FDTL inisiál EdC rezulta kanek matan.
Ho nune’e, membru F-FDTL inisiál EdC ba iha Postu bolu nia kolega sira atu hakalma situasaun refere, maibé derrepente de’it kilat mós tarutu, tanba membru F-FDTL inisiál EdC kanek no rezulta joven ida kanek.
Enkuantu, agora dadaun joven na’in rua ne’ebé kanek halo hela tratamentu iha Óspitál Nasionál Guidu Valadares (HNGV) Díli.
Jornalista: Natalino Costa
Editór: Rafael Ximenes de A. Belo
