BOBONARO, 19 agostu 2023 (TATOLI)-Xefe Estadu, José Ramos Horta husu Governu Konstitusionál da-sia lideradu Primeiru-ministru, Kayrala Xanana Gusmão, atu tau-matan ba Agrikultór sira iha Leber, Postu administrative Bobonaro, Munisípiu Bobonaro, tanba sira-nia produsaun koti di’ak tebes.
Notísia relevante:Uma-kain 273 iha suku Leber seidauk asesu eletrisidade
“Haree tau-matan ba agrikultór sira-nia negosiu. Iha ne’e (Leber) produsaun Koto di’ak los. Entaun, ha’u sei haree, ko’alia ho Governu sei lori Vise-Primeiru Ministru dezembolvimentu Rurál mai to’o iha ne’e, para estuda didi’ak oinsá bele fó apoia ba agrikultór sira para bele hetan folin di’ak liu ba sir- nia Koto,” Horta informa ba jornalista sira, iha aldeia Mabelis, sábadu ne’e
Alende ne’e, Prezidente Repúblika mós sei relata ba Ministra Edukasaun, Dulce de Jesus Soares, oinsá atu sosa komunidade sira-nia Koto hodi fó han ba estudante sira liu hosi Programa Merenda Eskolar.
Tuir Xefe Estadu, produsaun Koto iha suku ne’e di’ak tebes, maibé tanba kondisaun estrada difikulta agrikultór sira lori produtu asesu ba merkadu.
Tanba ne’e, nia parte sei ko’alia ho Primeiru-ministru, Kayrala Xanana Gusmão, no membru governu sira oinsá atu kria merkadu ho folin ne’ebé di’ak ba agrikultór sira iha suku refere.
“Hosi sira-nia to’os fatin tenke mai to’o iha ne’e lalin ho kuda, depois selu Truk ba Bobonaro, Maliana ba to’o Dili. Truk ne’e karun, entaun sira-nia kosar, servisu semana, fulan hira hasai osan selu tranporte. Osan ne’ebé tama tau iha sira-nia bolsu ne’e menus,” nia konsidera.
Xefe Suku Leber, Postu administrativu Bobonaro, Munisípiu Bobonaro, Joanico da Silva, komfirma suku durante ne’e komunidade agrikultór sira fa’an de’it ba emprezáriu sira ho folin nato’on deit, tanba laiha merkadu ne’ebé di’ak.
“Sira ba fa’an iha Maliana, Bobonaro, maibé barak liu ne’e sira lori ba Dili, sira selu Truk ne’e $200 dolar. Ida ne’e mak difikuldade ba sira” Autoridade lokál ne’e hato’o ba PR.
Enkuantu, suku Leber iha poténsia teb-tebes ba produtu Koto, nune’e kada tinan komunidade agrikultór sira halo époka dala rua; tempu udan no bailoro ho nia rezultadu tinan ida bele to’o tonelda 200 resin.
Notísia relevante:CLN prepara millaun $8 sosa produtu lokál variedade hitu
Jornalista: Sergio da Cruz
Editór: Rafael Ximenes de A. Belo
