Top

Deputadu CNRT-KHUNTO husu Governu submete kandidatu komisáriu CAC

Edifísiu CAC. Imajen/Média CAC.

DILI, 21 agostu 2023 (TATOLI)—Deputadu hosi bankada CNRT iha Parlamentu Nasionál (PN), Natalino dos Santos, kontinua husu ba IX Governu Konstituisionál atu submete kandidatu komisáriu Komisaun Anti-Korrupsaun (CAC, siglá portugés).

Notísia Relevante: PN hein Governu submete kandidatu Komisáriu CAC

“Bankada CNRT haree ne’e asuntu ida importante tebes, ne’e kna’ar ka kompeténsia Governu nian, Governu mak sei hato’o proposta kandidatu ba komisáriu CAC, Parlamentu Nasionál prontu hein de’it,” Deputadu Natalino dos Santos hateten ba jornalista sira iha uma fukum PN, segunda ne’e.

Deputadu hosi bankada Governu ne’e hateten, instituisaun CAC importante tebes atu hala’o nia kna’ar ho di’ak tenke iha ona lideransa foun, tanba tenke iha nia substitutu se lae serbisu labele la’o tanba komisáriu sesante nia mandatu ramata kle’ur ona, nune’e fiar iha tempu badak Governu bele haruka ona kandidatu sei aprezenta mai iha PN.

Membru PN ne’e prefere kandidatu komisáriu CAC presiza ema tenke jurista no profisionalizmu, domina mateira liga ho instituisaun ne’e no tenke ema independente ho responsabilidade, nune’e bainhira asume kna’ar labele inklina ba kór A ka B.

“Ba ha’u, ita-nia jurista timoroan barak iha kompeténsia ba ida-ne’e.Agora, depende ba eskolla, no Parlamentu Nasionál hein de’it bainhira to’o mai, tanba tenke dois terços,” nia dehan.

Deputadu KHUNTO, António Verdiál de Sousa, hateten kompeténsia eskluziva Governu nian atu nomea lalais kandidatu komisáriu CAC hodi haruka mai Parlamentu Nasionál (PN).

Notísia Relevante: Komisáriu CAC Sergio Hornai nia mandatu ramata iha 21 janeiru

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!