Jerente TradeInvest husu timor-oan konsumu produtu bee rai-laran
DILI, 21 agostu 2023 (TATOLI)—Ajénsia Promosaun Investimentu no Esportasaun, Institutu Públiku (TradeInvest, I.P) husu ba timor-oan, liu-liu entidade Estadu hotu atu konsumu no utiliza produtu bee hemu hosi rai-laran bainhira realiza eventu ruma ou hala’o atividade diaria.
“Investimentu bee ho marka Gota ne’e 100% hosi timor-oan, atu dehan katak ita ba partisipa festa iha suku to’o aldeia sira hotu uza ona bee Gota, tanba ami rasik bainhira ba enkontru maka ema la tau bee Gota, ami krítika tanba ita ezije kria postu traballu maibé ita hemu fali bee nasaun seluk nian,” Diretór Ezekutivu TradeInvest, Arcanjo da Silva, hateten ba Agência Tatoli, iha ninia knaar fatin, Colmera, foin lalais ne’e.
Notísia relevante : TradeInvest organiza forum emprezariál kona-ba investimentu no esportasaun iha Singapura
Nia dehan, laboratóriu prova ona katak bee Gota ninia kualidade a’as no timor-oan mak na’in ba empreza ne’e rasik.
Aleinde ne’e, tempu badak sei halo lansamentu reinvestimentu iha munisípiu Liquiçá ho razaun demanda sa’e, tanba ne’e presiza halo produsaun barak.
“Demanda sa’e ne’e mosu tanba ho desizaun Governu nian ba hasa’e taxa importasaun, entaun produtu hanesan bee hosi nasaun seluk tama mai nafatin mós presu labele kompete ho produtu ne’ebé iha rai-laran,” nia akresenta.
TradeInvest mós husu atu konsumu bee hemu ho marka Fresca, tanba maski investidór hosi rai-li’ur maibé fábrika halo iha rai-laran.
“Tanba ne’e ami mós promove bee Fresca ne’ebé iha akordu ho empreza Aero Dili katak bee ne’ebé uza bainhira sa’e aviaun Aero Dili ne’e tenke uza Fresca. Tanba sá la’ós Gota? ne’e depende ba empreza atu eskolla,” Diretór tenik.
Gota ninia espesifikasaun iha label ne’e ho lian portugés hotu, ne’ebé difísil tanba ema estranjeiru sira ko’alia lian inglés bainhira sira atu konsumu bee ida sira sempre haree uluk lai ninia espesifikasaun.
“Ida-ne’e sira tenke muda tanba ita iha dalan nu’udar membru plenu ASEAN ne’e sira tenke muda ba lian inglés,” nia sujere.
Jornalista : Antónia Gusmão
Editora : Julia Chatarina
