iklan

EDUKASAUN, HEADLINE

Konta bankária estudante rihun 2-resin iha hela prosesu identifikasaun

Konta bankária estudante rihun 2-resin iha hela prosesu identifikasaun

Diretór-Jerál Administrasaun no Finansa hosi MEJD, Antoninho Pires. Imajen Tatoli/Francisco Sony

DILI, 21 agostu 2023 (TATOLI) – Ministériu Edukasaun (ME) halo identifikasaun ba konta bankária estudante bolsa méritu 2.071 ne’ebé sei iha problema, tanba Banku Nasionál Komérsiu Timor-Leste (BNCTL, sigla portugés) seidauk bele halo pagamentu.

Atubele transfere osan ba benefisiáriu presiza konta bankária ne’ebé indika ba paupansa matenek no la’ós konta bankária sira seluk.

“Estudante bolsa méritu 2.071 ne’ebé seidauk hetan sira-nian direitu tanba konta ne’ebé sira loke la korresponde ho programa ne’ebé maka banku hakarak. Antes ne’e, ita hanoin katak konta ne’ebé estudante sira loke iha BNCTL ne’e bele asesu hotu ba programa bolsa méritu, maibé konta sira ne’e iha nia programa rasik ne’ebé la uza arbiru atu halo transferénsia osan”, Diretór-Jerál Administrasaun no Jestaun Finansa, Antoninho Pires, esplika iha Vila Verde, ohin.

Daudaun ne’e, banku hein hela prosesu identifikasaun konta bankária estudante sira-nian. “Prosesu hotu la’o hela, fiar katak tempu besik kuandu renova ona, estudante sira bele hetan ona pagamentu”.

Xefe Divizaun Tezouru BNCTL, Joaquim Martins, relata katak banku sei hein hela prosesu identifikasaun no bainhira loos ona no ministériu haruka fali lista foun mai banku bele hala’o ona pagamentu.

“Ami labele foti desizaun mesak, tanba ne’e husu ona ba ministériu maka bele halo identifikasaun depois maka sira haruka lista mai ami selu de’it”, afirma.

Rekorde katak BNCTL transfere ona, iha faze dahuluk, osan millaun $3 ba konta benefisiáriu bolsa méritu 5.407 nian, tanba dokumentu husi estudante sira ne’e laiha problema.

Joaquim Martins afirma katak antes ne’e banku simu ona osan millaun $4,2 husi Ministériu Edukasaun atu selu ba estudante bolsa méritu rihun 7-resin (iha faze dahuluk) iha territóriu, maibé seidauk bele selu hotu tanba estudante balun presiza hadi’a sira-nian dokumentu bankáriu.

Nune’e sei falta osan millaun $1,2 mak seidauk transfere ba konta estudante 2.071 tanba konsidera sei iha problema.

Notísia relevante: BNCTL transfere ona osan ba benefisiáriu bolsa méritu 5.407

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!