DILI, 22 agostu 2023 (TATOLI)—Ministru Administrasaun Estatál (MAE), Tomás Cabral, hateten komemorasaun loron Konsulta Populár ba dala-24 (30 agostu 1999-30 agostu 2023) ne’ebé sei komemora iha 30 agostu ne’e, hahú ho atividade limpeza iha sidade Dili.
Notísia Relevante: Lere: povu-nia brani iha konsulta populár mak Timor-Leste hetan independénsia
Governante ne’e hatutan, atividade limpeza hodi hamoos lixu iha kapitál Dili ne’e bazeia ba tema “Mai ita halo limpeza ba ita-nia hela fatin” hodi komemora loron istóriku Konsulta Populár.
“Ita komemora Konsulta Popular mak mai ita hamoos lixu iha ita-nia sidade no ida-ne’e kontribui ona ba ita-nia komemorasaun ne’e. La’os dehan hanoin festa de’it maibé tenke hamoos lixu iha sidade no hasai lixu iha tasi laran no tasi ibun sira. Loron 30 agostu ne’e, hamoos ita-nia uma rasik, ita-nia bairru rasik no ita-nia nasaun. Ami sei halo mobilizasaun atu ita hotu halo limpeza iha esgotu no jardin sira iha Dili,” Tomas Cabral hateten ba jornalista sira, iha resintu Parlamentu Nasionál, tersa ne’e.
Nia hateten, orsamentu ba komemorasaun loron Konsulta Populár iha 30 agostu 2023 ne’e, to’o agora seidauk aloka tanba Governu no Parlamentu Nasionál daudaun ne’e halo hela debate ba proposta Orsamentu Retfiikativu 2023.
Notísia Relevante: Rezultadu Referendu 1999: Timoroan 344.580 Rejeita Autonomia
Entretantu, iha tersa (22 agostu) ne’e, Parlamentu Nasionál (PN) aprova ona proposta Orsamentu Retifikativu (OR) ba tinan 2023 ho montante billaun $1.7-resin iha faze jeneralidade ho rezultadu votu a-favór 41, kontra 0 no abstensaun 23, no Deputadu hosi bankada FRETILIN ho PLP mak vota a
Sifnifika, PN aprova pakote proposta-lei tolu ne’ebé Governu aprezenta hanesan proposta-lei ba alterasaun dahuluk lei Nú. 15/2022, 21 dezembru, kona-ba Orsamentu Jerál Estadu (OJE) 2023, lei Nú. 2/2022, 10 fevereiru, kona-ba Enkuadramentu ba OJE no Jestaun Finanseira Públika no alterasaun daruak lei Nú. 8/2008, 30 juñu, lei Tributária.
Notísia Relevante: “Espíritu Referendu Mak Rekonsiliasaun”
Jornalista : Osória Marques
Editór : Cancio Ximenes