COVALIMA, 22 agostu 2023 (TATOLI)—Sekretária Estadu Formasaun Profisionál no Empregu (SEFOPE) munisípiu Covalima, hahú hosi fulan-janeiru to’o fulan-agustu tinan 2023 ne’e, SEFOPE Covalima rejista kazu disputa laborál iha servisu fatin hamutuk 60.
“Ami rejista kazu disputa laborál kuaze semana-ida ami simu kazu haat (4) to’o lima (5). Kazu disputa laborál ne’ebé SEFOPE Covalima rejista mak hanesan kompañia selu traballadór sira nia saláriu tarde, kompañia hakotu relasaun servisu tanba traballadór la hala’o dever no traballadór rasik deside rezigna aan hosi servisu, tanba kompañia selu saláriu tarde,” António Carvalho hateten ba jornalista-sira, resintu AMC, Sukaer Laran, tersa ne’e.
Hafoin simu keixa husi traballadór sira, SEFOPE hala’o mediasaun nune’e kompañia aprezenta razaun katak la’ós kompañia lakohi selu traballadór nia saláriu, maibé problema Governu seidauk halo pagamentu no mós kompañia deside hapara traballadór nia kontratu tanba traballadór la kumpre nia dever.
Tuir dadus, SEFOPE Covalima rejista kazu laborál 60 ne’ebé maiória kompañia lokál 40-resin viola traballadór sira-nia direitu no kompañia Internasionál 10-resin
Antes ne’e, iha loron 11 fulan-maiu tinan 2022, eis Diretór SEFOPE hahú fulan-janeiru to’o maiu tinan 2022 rejista kazu laborál lima (5) ho tipu kazu disputa laborál hanesan kazu disputa laborál kompensasaun servisu traballadór ne’ebé servisu liu oras no hakotu servisu traballadór.
Jornalista : Celestina Teles
Editór : Cancio Ximenes
