STAE Covalima destaka operadór-asistente REABD ba postu sira iha setembru

COVALIMA, 23 agostu 2023 (TATOLI)—Sekretáriu Tékniku Administrasaun Eleitorál (STAE) Covalima, destaka operadór no asistente atu halo atendimentu Resensiamentu Eleitorál Apoiu Baze Dadus (REABD) prepara ba eleisaun xefe suku ba postu administrativu sira iha Covalima, iha fulan-setembru tinan ne’e.

Notísia Relevante: Governu sei revee lejislasaun hafoin implementa poder lokál

“Operdór no asintente sira-ne’e sei asina kontratu iha loron 01 fulan-setembru, nune’e ita sei destaka sira iha loron 04 fulan-sembru, halo atendementu Resensiamentu Eleitorál Apoiu Baze Dadus (REABD), prepara ba eleisaun xefe suku iha postu administrativu sira iha Covalima,” Diretór STAE Covalima, Francisco Gusmão, hateten ba Agência Tatoli, iha nia kan’ar fatin Kampung Baru, kuarta ne’e.

STAE sei destaka operadór no asistente hirak ne’e iha loron 04 fulan-setembru ba postu administrativu sira, tanba operadór no asistente sira sei asina sira-nia kontratu iha loron 01 fulan-setembru tinan 2023.

Preparasaun STAE atu destaka operadór no asistente ba postu sira, tenke iha ekipamentu hosi STAE nasionál lori ona mai iha munisípiu Covalima, no agora halo ona briefing oinsá atu utiliza ekipamentu bainhira halo atendimentu ba sidadaun sira.

Operadór no asistente hirak ne’e, sira-nia kontratu sei ramata iha loron 15 fulan-dezembru tinan ne’e, tanba tuir dadus STAE Covalima halo rekrutamentu operadór no asistente hamutuk na’in-14 ne’ebé kada postu administrativu sei destaka operadór na’in-ida ho asistente na’in-ida.

Entertantu, Munisípiu Covalima iha nia postu administrativu sira hanesan Fatululik, Fatumea, Maucatar, Fohorem, Tilomar, Suai no Zumalai, ho suku 30 no aldeia 148.

Notísia Relevante: Suku foun 10 ne’ebé estabelese iha 2017 la partisipa eleisaun suku

Jornalista  : Celestina Teles

Editór          : Cancio Ximenes.