2012-2023: Servisu Saúde Covalima rejista pasiénte HIV na’in-80
COVALIMA, 24 agostu 2023 (TATOLI)–Diretora Servisu Saúde Munisípiu Covalima, Maria de Fátima Moniz, hateten hahú hosi 2012 to’o 2023 ne’e, Servisu saúde Covalima rejista pasiénte ne’ebé sofre moras HIV hamutuk na’in-80.
Notísia Relevante: Servisu Saúde Covalima rejistu pasiénte HIV na’in-75
“Hosi tinan hirak ne’e, Servisu Saúde Munisípiu Covalima rejista ona pasiénte ne’ebé moras HIV kumulativa hamutuk-80,” Maria de Fátima Moniz hateten ba Agência Tatoli liuhosi WhatsApp, kinta ne’e
Identifikasaun kazu pasiénte HIV na’in-80 ne’e, pasiénte sira halo tratamentu ativu iha Suai hamutuk pasiénte na’in- 41, halo transferénsia sai pasiénte na’in-13 no pasiente ne’ebé mate ne’e hamutuk na’in-25.
Aleinde ne’e, profesionál saúde deteta pasiénte HIV na’in-ida (1) la konsege halo tratamentu, tanba viajen ba Nasaun Viziñu Indonézia to’o ohin loron seidauk fila.
Tuir nia, HIV bele hadaet liuhosi relasaun seksuál inklui jenitál sex, oral sex no anal sex, kontaktu raan ne’ebé afeta ho HIV, ida-ne’e liuhosi transfusaun raan liuhosi seringa, feramenta tatuajen (tato) ne’ebé bele halo kanek, no hosi inan ne’ebé afeta ba HIV iha durante partu ka hosi inan nia susu-been.
Moras HIV la hada’et liuhosi kaer liman, hakoak malu, uza sintina fatin hamutuk, han hamutuk iha uma-ida nia okos no uza hamutuk sasán han no hemu ni’an.
Entretantu, tuir dadus jerál ne’ebe Prezidente Institutu Naionál Kombate HIV/SIDA, I.P, Atanasio de Jesus, haktuir katak dadus rejista pasiénte HIV/SIDA hahú 2022 to’o 2023 hamutuk na’in-1.582 no óbitu 278.
Notísia Relevante: 2003 to’o 2022, TL rejista pasiente HIV/SIDA na’in-1.582 no óbitu 278
Jornalista : Celestina Teles
Editór : Cancio Ximenes
