DILI, 24 agostu 2023 (TATOLI)–Sekretáriu Estadu Eletrisidade, Água no Saneamentu, Santos Noronha, hateten, Bee Timor-Leste, Empreza Públika (BTL, E.P) fa’an bee-moos ba públiku ho intensaun atu fasilita asesu ho lalais, liu-liu ba hirak ne’ebé presiza urjente.
“Intensaun BTL fa’an bee ne’e nu’udar maneira ida atu fasilita populasaun sira tanba presu ne’ebé fó kiik liu kompara ho sira seluk. Maibé ba oin sei hadi’a hodi fasilita komunidade hotu,” Sekretáriu Estadu informa ba Agência Tatoli, iha Parlamentu Nasionál, kinta ne’e.
Notísia relevante : BTL, E.P Viqueque rekolla reseita $3.000 resin iha trimestre daruak
BTL, E.P fa’an bee-moos litru 5.000 ho folin $12,50, enkuantu litru 8.000 ho folin $20.
Governante ne’e dehan, bainhira buat hotu la’o di’ak ona, la presiza ona fa’an bee ba komunidade.
BTL, E.P halo atendimentu ba kliente atu asesu bee-moos ho kritériu tenke lori Billete Identidade (BI), halo mapamentu ba kliente ne’ebé foin sosa ba dahuluk, enkuantu ba kliente tuan lori filafali resibu tuan atu konfirma katak BTL ba ona ona hela fatin, atende dalan di’ak no la atende dalan kloot, dalan subida, dalan a’at.
Kritériu seluk, bele atende de’it kliente ne’ebé iha mangeira ho metru 20, atende hela fatin iha rai tetuk, la atende uma fatin iha foho leten, atende bee enxe iha profil ka tanki, la atende enxe iha jerigen litru lima, no atendimentu iha Dili de’it.
Jornalista : Antónia Gusmão
Editora : Julia Chatarina
