VIQUEQUE, 21 agostu 2023 (TATOLI)—Bee Timor-Leste, Empreza Públika (BTL, E.P) munisípiu Viqueque rekolla ona reseita ho montante $3.717,40 ba kofre Estadu, iha trimestre daruak tinan ne’e.
“Reseita sira ne’e ami rekolla liuhosi konsumidór sira ne’ebé durante ne’e konsume bee-moos. Nune’e daudaun ami kontinua halo instalasaun kontadór iha postu Viqueque Vila, maibé ekipamentu instalasaun kontadór balun sei iha nasionál,” Diretór Servisu BTL, E.P, Marito da Costa, informa ba Agência Tatoli, iha ninia knaar fatin, Beloi, segunda ne’e.
Notísia relevante : BTL, E.P Viqueque identifika ona rekursu bee-matan atu dada ba abitante Uatulari
Tékniku BTL, E.P instala ona kontadór 300 resin iha zona 1 hosi Beloi, bainhira ramata mak muda ba zona seluk ne’ebé seidauk monta.
“Ami agora kontinua haree zona ida iha Beloi ne’ebé ami konsidera zona mean tanba ema monta ilegál barak. Entaun ami tenke foku iha zona ne’e, bainhira ami rezolve hotu maka muda bá zona seluk. Tama novembru ami sei alarga bee-moos ba zona seluk,” nia akresenta.
Tékniku sira instala ona metru kontadór ba uma-kain hamutuk 1.218 iha postu Viqueque Vila.
“Daudaun ne’e ami kontinua utiliza rekursu bee-moos hosi Luihuno hodi responde ba nesidade konsumidór sira maibé rekursu ne’e la sufisiente. Nune’e ami planeia ona atu buka rekursu reforsa bee-moos iha Loihuno, ne’ebé ami agora identifika ona hosi bee-mota sai rekursu alternativu hodi alarga sistema bee-moos ba abitante sira,” Diretór tenik.
Tuir dadus, BTL, E.P rekolla reseita $.5.245,70 iha trimestre dahuluk no rekolla $1.810,60 iha trimestre datoluk ne’e.
Jornalista : Vitorino Lopes da Costa
Editora : Julia Chatarina
