DILI, 25 agostu 2023 (TATOLI)–Prezidente Konsellu Kombatente Libertasaun Nasionál (CCLN, sigla portuges), Vida de Jesus “Riak Leman”, hateten loron konsulta popular iha 30 agustu 1999 hanesan loron ida-ne’ebé importante tebes ba timoroan no timoroan rasik mak esforsu hakotu terus no presaun oioin hodi prega metin Ukun rasik-aan ho pregu oan ida.
Notísia Relevante: Hanoin hikas “Akordu 5 de Maio 1999”
“Istória ida-ne’e sei la lakon hosi timoroan sira-nia fuan no laran no sei ba nafatin. Tanba, loron konsulta populár nu’udar loron ida-ne’ebé mak importante no iha valór boot ba povu tomak no rai ida. Loron konsulta populár ne’e, hanesan loron definitiva no desizaun finál hodi hakotu lia. Konsulta popular ida-ne’e mai ita hotu halo reflesaun hamutuk liuliu ba lideransa partidu politiku sira hodi voloriza no fo sentidu ida-ne’ebé loloos ba loron importante ne’e. Tanba, loron ida-ne’e mak loron ba povu hodi hakotu lia terus, ameasa no presaun oioin ho pregu oan ida hodi prega metin ukun rasik-aan,” Riak Leman hateten ba Agência Tatoli, iha nia kna’ar fatin Arte moris, Comoro, kinta (24 agostu 2023) ne’e.
Aleinde ne’e, nia hatutan, loron Konsulta Populár 30 agostu 1999 ne’e liuhosi prosesu ne’ebé mak boot, todan no vida a morte mak foin hetan Liberdade, tanba luta ba determinasaun no libertasaun Estadu ida-ne’e nu’udar luta koletiva ida hosi povu.
“Konsulta popular ne’e liuhosi prosesu ne’ebé mak boot no todan no vida a morte. Ukun rasik a’an konkista ho raan no ruin hosi povu ne’ebe hakarak liberta rai no Estadu hosi milisia. Luta ba determinasaun no libertasaun estadu ida-ne’e nu’udar luta koletiva ida husi povu, martires no eroi sira-ne’ebe mak la hakiduk hodi kontra imperializmu no invazaun ne’ebé mak esplora no diskrimina timoroan tomak, hamutuk no haterus povu hosi loron, fulan no tinan iha-nia rai rasik,” Riak Leman dehan.
Tanba ida-ne’e, nu’udar veteran ida, Riak Leman husu ba joven timoroan no jerasaun futuru sira, atu halo reflesaun iha loron importante konsulta popular ba dala-24 ne’e, atu nune’e timoroan nafatin valoriza no dignifika istória no vitória ne’e iha futuru.
Notísia Relevante: Komemorasaun Konsulta Populár ba dala-24 ho atividade limpeza iha sidade Dili
Jornalista : Osória Marques
Editór : Cancio Ximenes
