Tempu badak Governu sei aprezenta kandidatu komisáriu CAC ba PN
DILI, 28 agostu 2023 (TATOLI)—Vise Ministru ba asuntu Parlamentár, Adérito Hugo da Costa, hateten iha tempu badak IX Governu Konstituisionál sei aprezenta kandidatu komisáriu Komisaun Antí-Korrupsaun (CAC, siglá portugés) ba Parlamentu Nasionál (PN).
Notísia Relevante: PN hein Governu submete kandidatu Komisáriu CAC
“Ita-boot sira hatene pozisaun Governu nian agora prepara hela kompleta lei orgánika liña ministeriál sira, hafoin sei kompleta diploma ministeriál ka dekretu ne’ebé iha. Entaun, iha ne’e mak Governu sei halo andamentu ba oinsá entidade sira-ne’ebé seidauk kompleta ne’e kompeténsia Governu nian,. Iha tempu badak, Governu sei aprezenta mai Parlamentu hodi pozisaun Governu nian klaru ba iha futuru CAC nian,” Vise Ministru ne’e hateten ba jornalista sira iha uma fukum Parlamentu Nasionál, segunda ne’e.
Tamba ne’e, nia hateten, iha tempu badak Governu sei aprezenta kandidatu komisáriu CAC mai iha PN, maibé Governu mós haree hela CAC avansa nafatin ninia protofóliu atuál ka avansa ho mundansa protofóliu, ne’e iha hela diskusaun informál.
“Ha’u labele adianta buat ruma, kuandu iha ona desizaun finál konkreta mai aprezenta kandidatu ho alterasaun ba estatutu sein alterasaun, entaun ita iha ne’e aguarda hela. Governu atu adianta serbisu sira-ne’ebé nesesita mai sedu posivél,” nia hateten
Notísia Relevante: Komisáriu CAC Sergio Hornai nia mandatu ramata iha 21 janeiru
Jornalista : Nelson de Sousa
Editór : Cancio Ximenes
