DILI, 29 agostu 2023 (TATOLI)—Ministru Negósiu Estranjeiru Bangladesh, Abdul Kalam Momen, hamutuk ho delegasaun hasoru malu ho Primeiru-Ministru (PM), Kay Rala Xanana Gusmão, hodi hato’o posibilidade kooperasaun no ideia balun.
“Bangladesh ninia seguransa ai-han di’ak. Ami kompromete apoia Timor-Leste kombate inseguransa ai-han. Ami hanoin ba seguransa ai-han desde funu iha Ukraina, ami sei hamutuk ho Timor-Leste hodi hasoru problema seguransa ai-han no problema seluk tan,” Abdul Kalam, hateten hafoin hasoru malu ho Xefe Governu, iha Palásiu Governu, tersa ne’e.
Notísia relevante : MAP garante iha estoke foos sufisiente responde ba situasaun inseguransa ai-han
Aleinde ne’e, Diplomata ne’e hakarak fahe esperiénsia balun relasiona ho mudansa klimátika.
Bangladesh hanesan nasaun datoluk prodús foos iha mundu. Iha tinan 2000, ema ki’ak iha Bangladesh hamutuk 48,9% maibé ho autoridade no populasaun ninia esforsu durante tinan barak, iha tinan 2022 konsege redus númeru kiak ba 18,7%.
“Mudansa klimátika hamosu problema oin-oin mai Bangladesh, maski ita-nia kontribuisaun ba mudansa klimátika naton, ita tenke serbisu hamutuk hasoru dezafiu ne’e,” nia akresenta.
Biban ne’e, Abdul Kalam konvida Xanana Gusmão vizita Bangladesh, no promete sei serbisu hamutuk halo diskusaun hodi solusiona problema iha Timor-Leste, liu-liu seguransa ai-han no problema sira seluk.
Biban hanesan, PM Xanana dehan vizita delegasaun ne’e nu’udar vizita dahuluk.
“Hasoru malu ida-ne’e hatudu katak Ministru loke odamatan mai ita hodi hatene barak liután dezenvolvimentu iha setór oin-oin iha Bangladesh. Hau mós la imajina no foin hatene katak nasaun kiik hanesan Bangladesh ho ninia populasaun miliaun 170 maibé konsege susesu,” Xefe Governu dehan.
Nia nota mós katak Bangladesh konsege sai nasaun dinámiku iha ekonomia, rekursu umanu, no área barak, tanba ne’e Timor-Leste presiza estuda hosi nasaun ne’e. Nasaun rua ne’e la hanesan maibé saida mak populasaun halo sai ezemplu di’ak ba Timor-Leste hodi hatene kompromisu no kapasidade hodi oferese buat di’ak ba populasaun.
Delegasaun ne’ebé vizita PM Xanana inklui mós kandidatu Bangladesh ba Diretór Rejionál Organizasaun Mundiál Saúde (WHO, sigla inglés) iha Sudeste Aziátiku, Saima Wazed.
“Timor-Leste rasik sei partisipa iha eleisaun iha fulan-outubru 2023 hodi hili mós Saima,” Xanana tenik.
Jornalista : Antónia Gusmão
Editora : Julia Chatarina
