iklan

NASIONÁL, POLÍTIKA

PN aprova rezolusaun kondena espulsa diplomata timoroan no solidariedade povu Myanmar

PN aprova rezolusaun kondena espulsa diplomata timoroan no solidariedade povu Myanmar

Plenária Parlamentu Nasionál. Imajen TATOLI/António Gonçalves.

DILI, 29 agostu 2023 (TATOLI)—Parlamentu Nasionál (PN), tersa ne’e, liuhosi reuniaun plenária aprova projetu rezolusaun kondena espulsa diplomata timoroan no solidariedade povu Myanmar.

Notísia Relevante: PM Xanana husu líder membru ASEAN fó solusaun ba problema Myanmar

“Rezultadu votasaun a-favór 57, kontra no abstensaun 0, nune’e projetu rezolusaun ne’e aprovadu,” Prezidente Parlamentu Nasionál Interina, Maria Terezinha Viegas, hateten iha sala plenária PN.

Vise Sekretária Meza PN, Bendita Magno lee sai projetu rezolusaun ne’e katak, iha 25 agostu junta militár Myanmar espulsa enkaregadu negósiu Embaxada Repúblika Demokrátika Timor-Leste iha Myanmar.

Iha 01 fevereiru 2021 Repúblika Uniaun Myanmar sofre golpe militár depois maiória sidadaun iha eleisaun jerál enfrenta guerra sivíl prolonga rezulta to’o agora ema mate lubun no detensaun por volta  rihun 17 prezu polítiku, Timor-Leste kondena golpe militár ba violénsia militár kontra sivíl, no apela hapara violénsia no violasaun direitu umanu no espresa apoiu inkondisionál inisiativa dezenvolve hosi komunidade internasionál nomeadamente ASEAN ba repozisaun orden demokrátika iha nasaun no respeita vontade hosi povu .

PN reitera nesesidade respeita valór fundamentál Estadu direitu demokrátiku ba protesaun direitu umanu no dignidade umana, valór ne’ebé sempre iha luta indepedénsia Timor-Leste hanesan parte ita nia identidade, nune’e diálogu permite solusaun pás konstrutiva.

PN apela ba apoiu esforsu dezenvolve ba rezolusaun pasífika salvaguarda seguransa sidadaun hotu no respeitu ba sira-nia direitu fundamentál.

PN iha reuniaun sesaun plenária kondena espulasaun diplomata timoroan iha Myanmar, profunda solidariedade ho povu Myanmar, apela solusaun pasífika krize iha nasaun permite estabelesimentu no restaura ordern demokrátika.

Projetu rezolusaun ne’e aprezenta hosi Deputadu proponente Duarte Nunes (CNRT), David Dias Ximenes ‘Mandati’ (FRETILIN), Maria Angelina Sarmento (PLP).

Deputadu Duarte Ximenes hateten, haree ba situasaun ne’ebé povu Myanmar hasoru Timor-Leste presiza solidariedade atu nune’e bele iha mudansa.

“Kona-ba espulsa diplomata timorense asaun ne’e sira foti, tamba deklarasaun ne’ebé ita-nia Primeiru-Ministru, Prezidente Repúblika halo relasaun ho situasaun povu Myanmar hasoru, situasaun povu Myanmar la’ós hetan kondisaun hosi ita, maibé hosi Konsellu Seguransa ONU mós ko’alia katak situasaun ne’ebé akontese iha ne’eba labele kontinua. Tanba depois eleisaun demokrátika Prezidente ne’ebé manán junta militár lakohi simu hodi hamosu situasaun no antes ne’e mós hamosu ona situasaun nune’e mundu hotu hatene,” nia hateten.

Nune’e, Timor-Leste sente fó solidariedade ne’e haree ASEAN hanesan organizasaun mós halo ona rezolusaun maibé to’o agora implementasaun rezolusaun laiha, tanba ne’e PN nu’udar reprezentante povu iha esperénsia iha tempu liu ba (luta libertasaun), ne’ebé ohin loron povu Myanmar sente tenke espresa hatudu TL nia solidariedade no situasaun ne’e labele kontinua.

“Tanba ne’e, saida mak junta militár halo ba ita-nia reprezentante ida-ne’e mai hatudu katak, sira lakohi ema mai interven ba sira-nia situasaun ukun. Maibé sira haluha tiha tempu ba tempu sira sei izola an, hein de’it desizaun ikus ASEAN karik iha presaun forte liután, atu nune’e bele iha rezultadu ita haree iha tempu oin mai,” nia dehan.

Deputadu David Dias Ximenes ‘Mandati’ hateten Estadu Repúblika Timor-Leste komunga Estadu direitu demokrátiku, nune’e apoiu povu Myanmar hodi futuru mai instaura demokrásia, ho postura ne’e junta militár halo espulsa diplomata timoroan, nune’e kontinua fó solidariedade.

Notísia Relevante: Governu TL lamenta desizaun hosi Governu rejime militár Myanmar

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!