DILI, 31 agostu 2023 (TATOLI)–Autoridade Inspesaun no Fiskalizasaun ba Atividade Ekonómika, Sanitária no Alimentár, institutu Públiku (AIFAESA, I.P) publika rezultadu teste laboratóriu ba amostra foos importadu ho marka Manu Vitoria, ne’ebé hatudu katak foos ne’e ho kondisaun di’ak no bele konsumu.
“Hosi teste laboratóriu ne’ebé hala’o iha Badan Pengawas Obat dan Makanan (BPOM) Kupang, Indonézia, rezultadu teste hatudu katak jeralmente foos ho marka Manu Vitoria iha kondisaun di’ak bazeia ba parametru ne’ebé mak rekomenda tuir Standar Nasional Indonesia (SNI) nomós Codex Alimentáriu nian,” Diretór Departamentu Operasaun AIFAESA, I.P, Viriato Paulo, hateten liuhosi konferénsia imprensa, kinta ne’e.
Notísia relevante : AIFAESA, I.P husu públiku provizóriamente labele konsumu foos marka Manu Vitoria
Relasiona ho kondisaun foos ne’kor kinur ka malahuk, ho indikasaun bainhira tein tasak iha iis, tanba kategoria Beras Pratanak (foos ne’ebé rekomenda ba ema sofre diabete no obesidade) maibé produtu ne’e la afeita ba moras ruma ka ema-nia saúde no bele konsumu.
Hosi rezultadu teste laboratóriu BPOM Kupang no análiza téknika hosi AIFAESA, informa ba públiku katak:
- Foos ho marka Manu Vitoria laiha indikasaun ba kontaminasaun ho substánsia fízika no kímika ne’ebé prejudika ema-nia saúde;
- Operadór Ekonómika sira hotu iha territóriu Timor laran tomak, ne’ebé provizóriamente AIFAESA suspende sirkulasaun produtu foos ho marka Manu Vitoria, ho abertamente autoriza hikas sirkulasaun ka komersializasaun produtu foos ne’e ba públiku;
- Rekomenda ba importadór foos sira hotu atubele halo klarifikasaun ba públiku ligadu ho kualidade foos antes fa’an bainhira iha mudansa ruma;
- Ba konsumidór sira hotu iha teritóriu Timor Laran tomak katak, ne’ebé provizóriamente AIFAESA rekomenda atu la sosa produtu foos ho marka Manu Vitoria to’o anúnsiu rezultadu teste laboratóriu tuir mai, fó sai ba públiku tomak bele sosa no konsumu hikas foos ne’e tanba rezultadu laboratóriu hatudu di’ak ba ema-nia saúde;
- Enkoraja ba operadór ekonómika no konsumidór sira hotu atubele servisu hamutuk ho autoridade kompetente sira hodi bele garante ai-han ne’ebé kualidade no seguru ba konsumu umanu.
Foin lalais AIFAESA informa ba públiku, liu-liu ba konsumidór no operadór ekonómika hotu katak produtu foos Manu Vitoria ne’ebé suspende provizóriu nia sirkulasaun iha merkadu liuhosi konferénsia imprensa ne’ebé hala’o iha loron 07 jullu 2023 ho razaun tanba produtu ne’e deskonfia ho kualidade ladi’ak ka estragadu, ne’ebé husu hodi hein rezultadu teste laboratóriu.
Notísia relevante : Empreza distribuidora: “AIFAESA laiha teste laboratóriu ba foos Manu Vitoria”
Nune’e, liuhosi orientasaun ho ordem Inspetór Jerál AIFAESA nian ba ekipa téknika sira rekolla amostra iha loja distributór Perissos Vitoria, Lda, nomós loja retalista sira. Aleinde ne’e, ekipa téknika ho orden servisu hosi Inspetór Jerál , orienta transporta amostra foos ba BPOM Kupang iha loron 16 jullu 2023 no entrega amostra iha loron 17 jullu hodi ekipa téknika halo akompañamentu amostra teste laboratóriu.
Jornalista : Antónia Gusmão
Editora : Julia Chatarina
