OÉ-CUSSE, 01 setembru 2023 (TATOLI – Komisaun Nasionál Eleisaun (CNE, sigla portugés), sesta ne’e hahú abertura edukasaun sívika iha suku Malelat, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) hodi prepara ba eleisaun suku.
Notísia relevante: MAE konsulta Autoridade RAEOA bá progresu ezekusaun PNDS no eleisaun suku
Sensibilizasaun ne’e abertura hosi Autoridade RAEOA, liuhosi Sekretáriu Rejionál ba Asuntu Administrasaun, Martinho Abani Elu, hodi husu ba autoridade lokál sira atu kontinua fahe tutan informasaun kona-bá eleisaun suku.
“Ohin ita abertuta iha Malelat, suku sira seluk CNE sei tama, maib’e papél xefe suku, xeef aldeia sira hamutuk ho konsellu bairru, iha rsponsabilidade másima atu fahe informasaun ba komunidade sira, nune’e sira bele partisipa iha eleisaun atu hili xefe suku ho nia estrutura tomak,” Martinho Abani ko’alia iha Malelat.
Diretór CNE Oé-Cusse, Tomas Oqui Meta, informa, abertura sensibilizasaun kompeténsia ba CNE atu hala’o edukasaun sivíka, ba sidadaun hotu kona-bá aktu eleitorál iha territóriu Oé-Cusse, prepara ba eleisaun suku tanba Governu liuhosi Konsellu Ministru aprova ona sei akontese iha loron 28 outubru 2023 ne’e.
“Loron primeiru CNE RAEOA realiza sosializasaun ka edukasaun sivíka ne’e iha suku Malelat sub-rejiaun Pássabe, materia prinsipál ne’ebé CNE hala’o iha sosializasaun ne’e, tuir matadalan Lei númeru 9/2016 kona-bá prosedimentu aprezentasaun kandidatura no lala’ok eleisaun ba membru orgaun suku sira no oinsa hato’o keisa no reklamasaun karik mosu iregularudade iha prosesu eleisaun,” Tomas Oqui hateten.
Nia informa, daudaun ne’e CNE hahú loke ona vaga atu rekruta ofisiál supervizaun hamutuk na’in-63 hodi halo supervizaun iha eleisaun suku, tanba STAE identifika ona sentru votasaun ba eleisaun suku iha Oé-Cusse hamutuk 63.
Entretantu, hola parte prezensa iha programa sensibilizasaun ne’e, jestor sub-rejiaun Pássabe, Komandante Esquadra PNTL Pássabe, ekipa hosi STAE, no estrutura suku Malelat inklui komunidade sira ho totál partisipantes hamutuk 116.
Notísia relevante: Suku foun 10 ne’ebé estabelese iha 2017 la partisipa eleisaun suku
Jornalista: Abílio Elo Nini
Editór: Evaristo Soares Martins
