iklan

INTERNASIONÁL, HEADLINE

Xanana hato’o pedidu ba Liurai Brunei Darussalam apoia Timor-Leste iha área tolu

Xanana hato’o pedidu ba Liurai Brunei Darussalam apoia Timor-Leste iha área tolu

Primeiru-Ministru, Kay Rala Xanana Gusmão hamutuk ho delegasaun halo enkontru bilaterál ho Liurai Brunei Darussalam, Hassanal Bolkiah ne’ebé akompaña ho ninia ekipa, tersa (05/09/2023). Imajen/Mídia GPM

DILI, 06 setembru 2023 (TATOLI)-Primeiru-Ministru, Kay Rala Xanana Gusmão hamutuk ho delegasaun halo enkontru bilaterál ho Liurai Brunei Darussalam, Hassanal Bolkiah ne’ebé akompaña ho ninia ekipa, tersa (05/09) ne’e, hodi diskute kona-ba kooperasaun serbisu rai rua iha futuru.

“Brunei Darussalam nu’udar nasaun membru Asosiasaun Nasaun Sudeste Aziátiku (ASEAN, sigla inglés) ne’ebé iha kooperasaun di’ak mós ho Timor-Leste bele serbisu hamutuk hodi fó apoia ba Timor-Leste,” Xanana hateten liuhosi nota ne’ebé Agência Tatoli asesu, kuarta ne’e.

Primeiru-Ministru Xanana husu atu Liurai Brunei Darussalam, bele fó apoiu ba Timor-Leste iha setór saúde, edukasaun, petróleu no minerál inklui área importante seluk tan.

Notísia relevante : Empreza hosi Brunei Darussalam iha interese investe iha Timor-Leste

Enkontru ne’e realiza hafoin entidade rua ne’e partisipa iha konferénsia nível a’as (KTT, sigla indonéziu) ASEAN ba dala-43, ne’ebé hala’o iha Plenary Hall, Sentru Konvensaun Jakarta (JCC).

Biban ne’e, Liurai Hassanal Bolkiah konvida direta Xanana hodi halo vizita ba Brunei Darussalam bainhira iha tempu.

Nune’e, Xefe Governu komprometidu atu diskute hamutuk ho Prezidente Repúblika, José Ramos Horta katak iha selebrasaun 20 maiu 2024 (Restaurasaun Independénsia) bele konvida Liurai Brunei Darrusalam vizita mós Timor-Leste.

Durante enkontru, Xefe Governu Xanana hetan akompañamentu hosi Vise Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente Francisco Kalbuadi Lay, Ministru Negósiu Estranjeiru no Kooperasaun Bendito dos Santos Freitas, Ministru Interiór Francisco Guterres, no Vise Ministra Negósiu Estranjeiru Asuntu ASEAN Milena Rangel.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!