MALIANA, 07 outubru 2023 (TATOLI) – Sekretáriu Estadu Formasaun Profisionál no Empregu (SEFOPE), Rogério de Araújo Mendonça, akompaña hosi Diretór Nasionál Empregu Exterior, Paulo Alves, kinta ne’e halo vizita traballu ba edifísiu SEFOPE munisípiu Bobonaro no promete loke formasaun ho dalen tolu iha munisípiu refere.
Rogério de Araújo halo vizita traballu ne’e hafoin simu nu’udar Sekretáriu Estadu Formasaun Profesionál no Empregu.
Enkuantu vizita ne’e ho objetivu atu identifika problema sira-ne’ebé SEFOPE Bobonaro hasoru nune’e bele tau iha planu orsamentu 2024, nune’e mós identifika fatin atu harii sentru formasaun ba joven sira.
Sekretáriu Estadu Rogério de Araújo Mendonca, esplika, sentru formasaun refere sei estabelese iha tinan ne’e, foka liubá dalen tolu hanesan; korea, japaun no inglés.
Notísia relevante: SEFOPE Covalima sei estabelese sentru formasaun dalen inglés-korea
“Faze primeiru ba língua inglés, hodi responde ba merkadu Austrália nian,” governante ne’e informa asuntu ne’e ba jornalista sira hafoin halo vizita traballu.
Sentru refere sei estabelese iha munisípiu 14 ho intensaun atu redús joven sira ba tuir formasaun iha kapitál Dili. Maibe, molok estabelese sentru ne’e sei prepara uluk kondisaun sira hanesan, edifísiu, mobiliáriu, materiál imformátika, matadalan formasaun no rekruta formadór sira-ne’ebé orijen munisípiu idak-idak nian.
“Atu nune’e bainhira formasaun ne’e remata ita bele hetan kualidade ne’ebé di’ak, hodi kompete ba merkadu rai-laran no mós rai-li’ur,” nia hateten.
Diretór SEFOPE Munisípiu Bobonaro, Calisto Mau-Ati, husu ba joven sira atu prepara-aan di’diak hodi partisipa iha formasaun liuliu ba lian inglés atubele ba serbisu iha rai-li’ur.
“Ita-nia fatin iha kedas edifísiu SEFOPE, ne’ebé ba oin ita sei loke formasaun ba joven sira-ne’ebé interese, ita sei públika karik hahú ona, sentru ne’e sei sai permanente no nia kontinuasaun sei ba futuru,” nia katak.
Nia orgulu no agradese ba Sekretáriu Estadu Rogério de Araújo Mendonça tanba bele haree direta kondisaun no problema ne’ebé SEFOPE Bobonaro enfrenta.
“Ita espera bele tau konsiderasaun,” reponsável SEFOPE munisípiu Bobonaro ne’e espresa.
Enkuantu vizita traballu ne’e hala’o ona iha munisípiu Lautém, Baucau, Manufahi, Covalima, Ermere, Ainaro, sei ba Oe-Cuse no munisipiu sira seluk.
Notísia relevante: SEFOPE hahú identifika fatin ba sentru formasaun dalen Inglés-Korea iha Viqueque
Jornalista : Sérgio da Cruz
Editór : Evaristo Soares Martins
