Komisaun F husu MS prioriza estabelese sentru kardiolójia iha TL
DILI, 08 setembru 2023 (TATOLI)—Membru komisaun F trata asuntu Saúde iha Parlamentu Nasionál (PN), Deputada Maria Teresa Gusmão, husu IX Governu Konstituisionál liuhosi Ministériu Saúde (MS) atu fó prioridade estabelese sentru kardiolójia iha Timor-Leste.
Notísia Relevante: Deputada CNRT-FRETILIN husu MS aselera estabelese unidade kardiolojia
“Ami ba halo fiskalizasaun, agora ita redús ona uitoan pasiente ba li’ur, tanba ita iha ona mákina sira no ekipamentu hotu ne’ebé bele konsulta ba kardiovaskulár no rona sira prepra ona fatin iha Lahane, atu bele pasiente ne’ebé konsulta intensivu bele ba iha ne’eba. Tanba ne’e, buat hotu prosesu prepara didi’ak, nune’e presiza estabelese lalais ita-nia ekipamentu bele di’ak liután,” nia hateten ba jornalista sira iha uma fukun PN, sesta ne’e.
Nia husu ba MS atu haruka médiku timoroan hasai tan espesialidade hodi nune’e hotu-hotu integradu bele antende pasiente sira-ne’ebé ho moras fuan.
Deputadu FRETILIN, David Dias Ximenes “Mandati”, kontinua husu ba Ministériu Saúde atu prioriza estabelese sentru kardiolójia hodi bele fó atendimentu di’ak liután ba pasiente sira ho moras fuan, tanba durante ne’e haruka pasiente ba halo tratamentu de’it iha rai-li’ur.
“Aleinde ne’e haruka médiku timoroan ba kontinua estudu espesialidade no agora rekursu la sufisiente, nune’e bele kontrata médiku espesialista hosi rai-li’ur nune’e bele fó atendimentu dignu pa pasiente sira tanba durante ne’e sira ba hala’o de’it tratamentu iha rai-liur,” nia hateten
Notísia Relevante:Komisaun F rekomenda ba MS aselera estabelese unidade kardiolojia
Jornalista : Nelson de Sousa
Editór : Cancio Ximenes
