DILI, 08 setembru 2023 (TATOLI)–Prezidente Repúblika, José Ramos Horta, iha kinta (07/08), dekreta ezonerasaun Helder Lopes hosi funsaun Vise-Ministru Finansa.
“Prezidente Repúblika haree ba Konstituisaun Repúblika Demokrátika Timor-Leste (KRDTL), artigu 86, aliña h, no bazeia ba proposta hosi Primeiru-Ministru, dekreta ezonerasauna ba funsaun nu’udar Vise-Ministru Finansa iha IX Governu Konstitusionál, Helder Lopes,” refere nota ne’ebé Agência Tatoli asesu, sesta ne’e.
Notísia relevante : Governu hakarak revee lei impostu seletivu hodi normaliza presu sasán
Nune’e, dekretu ne’e sei entrada ein vigór iha loron hafoin loron publikasaun.
Helder Lopes halo funsaun nu’udar Vise-Ministru Finansa durante fulan-rua resin, hafoin simu pose hamutuk ho membru Governu seluk iha loron 01 juñu 2023.
Aleinde ne’e, nia konsege envolve iha elaborasaun proposta Orsamentu Retifikativu 2023, identifika planu no programa ba tinan 2024, inklui alterasaun lejizlasaun no sistema finansa públika.
Ba kestaun ezonerasaun, jornalista Agência Tatoli tenta konfirma Helder Lopes, via telefónika, maibé nia parte deside lakohi fó komentáriu no konfirma katak iha ona dekretu nomeasaun nu’udar Governadór Banku Sentrál Timor-Leste (BCTL, sigla portugés).
“Buat sira ne’e tau hotu ona iha Jornál Repúblika, iha dekretu ezonerasaun nian iha mós despaixu ba nomeasaun, ne’ebé ha’u labele ko’alia lai antes eventu sira ne’e akontese,” Helder hateten.
Jornalista : Antónia Gusmão
Editora : Julia Chatarina
