Agrikultór Tilomar husu Governu hadi’a irrigasaun Damuk tanba natar barak abandona
COVALIMA, 11 setembru 2023 (TATOLI)–Agrikultór iha postu administrativu Tilomar, munisípiu Covalima, Sebastião Bosco, husu IX Governu Konstitusionál atu hadi’a irrigasaun Damuk iha aldeia Ai-Oan no Salele Boot lokaliza iha Aldeia Sadahur, suku Maudemo, nune’e agrikultura sira bele utiliza hodi halai natar tanba natar barak mak agora abandona.
Notisia Relevante: Natar ektare 300-resin iha Suai Loro ameasadu sei abandona
“Ami-nia natar barak mak abandona iha postu administrativu Tilomar tanba ami hasoru problema sira hanesan bee laiha no la hadi’a irrigasaun Damuk, nune’e halo ami labele halai natar. Ami husu Governu atu haree kestaun ne’e,” Sebastião Bosco hoteten ba jornaiusta sira iha aldeia Ai-Oan, suku Lalawa, segunda ne’e.
Natar bandona ne’e la’ós tanba agrikultór sira mak baruk atu halai natar maibé tanba problema bee laiha no populasaun husik sira-nia animal hanesan kuda, karau, bibi no fahi husik la’o livre, hodi estraga sasán sira.
Nia hateten, iha tempu okupazaun Indonézia la halo lutu maibé livre atu halo toos no halai natar maibé agora atu halai natar no toos, animál estraga hotu no laiha tratór hodi utiliza ba halo natar no no bee laiha.
“Durante ne’e, ami halai natar dala ruma aluga de’it tratór selu $500 to’o 600 no ense rasik mina. Se lae, ami halai natar uza manuál hodi taa ho enxada no laiha estensionista atu fasilita ami no la fahe ai-moruk mai ami,” nia dehan.
Agrikultór Mario Amarál reforsa, natar barak iha postu administrativu Tilomar abandona la’ós agrikultór mak baruk atu halai natar maibé tanba irrigasaun mak aat.
“Ami abandona natar tanba irrigasaun la hadi’a. Iha tempu okupasaun Indonézia to’o ohin loron, ita hatene postu Tilomar potensiál tebes atu hasa’e produsaun hare, maibé rai bokur barak abandona,” nia hateten.
Ho nune’e, agrikultór husu Governu liuhosi Ministériu Agrikultura no Peska (MAP) atu hadi’a irrigasaun iha Damuk no irrigasaun iha Salele Boot iha suku Maudemo, postu administrativu Tilomar.
Diretór Servisu Munisipál Agikultura Covalima, Reinaldo Moniz Coli, hateten durante ne’e natar barak iha postu administrativu Tilomar abandona, nune’e servisu agrikultura Covalima tau ona planu atu hadi’a irrigasaun hodi hasa’e produsaun hare iha rai-laran.
Tuir dadus husi Servisu Agrikultura munisípiu Covalima haktuir, natar ektare 100-resin ne’ebé abandona iha postu administrativu Tilomar, munisípiu Covalima.
Aleinde natar abandona iha postu Tilomar, iha postu Administrativu Suai, suku Suai Loro no postu Administrativu Zumalai mós natar barak sei abandona.
Notisia Relevante: Natar ektare 523 iha Raimea ameasadu sei abandona
Jornalista : Celestina Teles
Editór : Cancio Ximenes
