DILI, 11 setembru 2023 (TATOLI)—Prezidente Partidu Frente Revolsionáriu Timor-Leste Indepedente (FRETILIN), Francisco Guterres Lú Olo, hateten presiza hadi’a ita-nia ekonomia molok adere sai membru plenu ASEAN.
Notísia Relevante: Timor-Leste adere ba ASEAN vantajen iha ekonomia rejionál
“Ita-nia ekonomia tenke hadi’a tanba ekonomia ha’u bele dehan ita sei hakdasak hela, ita depende hela de’it ba pais sira seluk nia produtu mak mai ita han. Ita uza de’it mak ita-nia osan fundu mina-rai tinan-tinan hodi halo Orsamentu Jerál Estadu nian, maibé osan ida-ne’e la buras iha ita-nia liman no ita-nia rai, halai sai hotu ba li’ur. Ita-nia produsaun iha rai-laran la buras ida, estrutura kona fali ba produsaun ninian hanesan defísil tebe-tebes para ita bele hamrik ekonomikamente hanesan país ida sustentável. Agora oinsá mak atu bele halo ida-ne’e, agora prontu ita haree buat barak iha Governu ne’e nia liman. Ita espera sira bele hola desizaun ida-ne’ebé di’ak para bele halo ekonomikamente país ida ne’e viável iha sentidu ita bele tama ba ASEAN ho seguru, serteza ho seguransa,” Lú Olo hateten ba jornalista sira iha sede CCF, Comoro, segunda ne’e.
Iha tinan 2025 Timor-Leste (TL) adere sai membru plenu ASEAN, nia hatán, TL presiza kumpre roteiru ne’ebé ASEAN fó, inklui presiza hadi’a mós ekonomia no área importante sira seluk.
“Presiza kumpre lai roteiru ne’ebé ASEAN fó mai ita hatete data bainhira ita bele sai membru permanente hanesan rekursu umanu, hametin tiha lai ita nia Estadu, ita hadi’a tiha lai ita-nia ekonomia halo didi’ak, ita hadia tiha lai ita nia infraestrutura sira hotu, depois mak ita sei hateten bele ona ka seidauk sai membru plenu ASEAN,” nia hateten.
Notísia Relevante: PR rekomenda IX Governu fó prioridade TL adere ba ASEAN
Jornalista : Nelson de Sousa
Editór : Cancio Ximenes
