RAEOA-Autoridade Indonézia halo screening masal iha fronteira hodi deteta moras hada’et
OÉ-CUSSE, 11 setembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Saúde marka ona kalendáriu hamutuk ho autoridade sira iha Distritu Timur Tengah Utara (TTU) no distritu Kupang hodi realiza screening masal ba komunidade sira iha liña fronteira hodi deteta moras hada’et, ba moras HIV-AIDS, TBC no malária.
Notísia relevante: RAEOA koordena TTU-Kupang halo promosaun integrada ba moras hada’et
Diretora Servisu Saúde Oé-Cusse, Lolita dos Santos, informa, atividade screening masal iha fronteira importante, nune’e iha futuru komunidade sira bele hatene halo prevensaun, no liuhosi screening masal, sei deteta iha parte fronteira ne’ebé mak sai risku ba moras hada’et hanesan HIV-AIDS, TBC ho malária.
“Tanba RAEOA haleu hosi TTU no Kupang, entaun planu hosi saúde RAEOA, ami hakarak nasaun rua ne’e, atu hamutuk halo screening masal, tanba enkontru lansamentu ita halo ona iha Wini, maibé tuir fali mai, ita sei halo oráriu hamutuk ho TTU no Kupang ba faze implementasaun,” Lolita dos Santos ba jornalista sira iha Oé-Cusse.
Ezemplu, tanba Oé-Cusse fronteira fronteira direita, labele halibur hotu komunidade sira hamutuk iha fatin ida, entaun maneira ida mak, oráriu ida de’it, no atividade mós sei halo loron ida, maibé parte RAEOA hala’o ninian, TTU mós hala’o ninian inklui Kupang.
Liuliu ba fronteira haat ne’e, hanesan Pante Makasar iha Wini, Oésilo iha Napan, Pássabe iha fronteira Haumen-Ana, no Nítibe iha Naktuka Oépoli. Entaun rezultadu hosi screening masal ne’e sei aprezenta fila-fali ba malu, atu hatene fronteira ne’ebé maka sai risku ba moras hada’et.
“Ida-ne’e mak nia objetivu, atu hatene iha fronteira ne’ebé maka sai risku ba moras hada’et tolu ne’e, no programa ne’e mós autoridade RAEOA sei tau iha Planu Asaun Anuál (PAA), kada trimestre bele implementa iha fronteira, nune’e fasil atu atende no halo prevensaun,” nia katak.
Notísia relevante: RAEOA realiza cross border meeting ho TTU prevene moras hada’et iha liña fronteira
Antes ne’e, Diretór Jerál Ministeriu Saúde, distritu Timur Tengah Utara (TTU), Robert Ceunfin, hateten, liuhosi croos broder meeting ho programa promosaun moras hada’et, iha rekomendasaun hosi parte TTU rasik no autoridade RAEOA, no konkorda ona atu halo screening masal.
“Tán ne’e planu ba screening masál entre TTU ho Oé-Cusse, liuliu iha fronteira ba moras tolu ne’e, objetivu atu identifika loloos iha fronteira ne’ebé maka kazu maioria nune’e ita bele hatene foku atu tau atensaun másima,” nia katak.
Alende ne’e mós planu hosi Ministériu Saúde iha TTU, sei realiza atendimentu públiku iha postu ualu (8) iha liña fronteira, komesa hosi postu saúde Wini, Napan, Imbate, Oé-Olo, Nimasi, Eban, Tasi-Nifu, Manamas inklui fronteira Naktura Oépoli.
“Kalendáriu ita prepara ona, ita-bele realiza iha fulan outubru to’o novembru, ne’e mós hetan akompañamentu hosi servisu saúde Oé-Cusse, hafoin remata mak ita kontinua fali ba postu saúde sira iha Oé-Cusse, pertense ba fronteira,” nia informa.
Notísia relevante: Ema 120 iha TTU Indonézia infetadu HIV-AIDS
Jornalista: Abílio Elo Nini
Editór: Evaristo Soares Martins
