HASATIL rekomenda Governu kontrola folin foos sa’e iha merkadu

DILI, 12 setembru 2023 (TATOLI)—Koordenadór Jerál Organizasaun Naun Governamentál Hadomi Agrikultura Sustentável Timor-Leste (HASATIL), Gil Horácio Boavida, rekomenda ba IV Governu Konstitusionál liuhosi Ministériu Komérsiu Indústria no AIFAESA atu kontrola folin foos sa’e iha merkadu ka loja sira tanba fó impaktu direta ba povu.
Notísia Relevante: PN husu AIFAESA fiskaliza presu sasán iha merkadu
“Ami sujere ba Ministériu Komérsiu Indústria ho AIFAESA atu kontrola folin sasán. Ha’u hanoin impaktu hosi folin sa’e ne’e, tanba sásan balun estoke tuan maibé ida-ne’e ita hotu nia preokupasau. Tanba, estoke tuan maibé negosiante halo tuir nia vontade hodi hasa’e folin sasán iha merkadu, entaun nia impaktu mak ba konsumidór rai-laran ne’e. Tanba, ita-nia importasaun hahan makaas liuliu foos maibé daudaun ne’e ninia folin sa’e. Se ita reforsa kontrolu mak ha’u hanoin ita bele regulariza folin foos ne’e,” ” Gil Horácio Boavida hateten ba Agência Tatoli liuhosi telefónika, tersa ne’e.
Tanba, tuir nia, bainhira Governu la kontrola folin foos ne’e mak sei prejudika ba ema-ne’ebé ho rendimentu kiik, nune’e presiza tau atensaun no kontrolu atu bele netraliza folin sasán iha Timor-Leste.
Reprezentante komunidade Comoro, Maria Imaculada, hateten iha loja mak folin sa’e ona entaun iha kioske kiik sira-ne’e sa’e makaas ne’ebé fó impkatu ba komunidade rendimentu kiik ne’e laiha kapasidade kompra (sosa) hodi sustenta família.
Notísia Relevante: Governu alerta ba negosiante labele halo espekulasaun presu foos
“Hanesan iha fatin balun foos kg 20 ne’e folin sa’e ba $17.50, ida-ne’e hamate ita ekonómia kiik no rendimentu ne’ebé menus no la sufisiente ba ita-nia moris loron-loron nian. Nune’e, husu ba parte relevante atu kontrola mós loja no kioske sira iha bairru laran. Tanba, dala ruma sira mak hasa’e folin foos ne’e sa’e makaas fali,” nia rekomenda.
Nia hatutan, mezmu Parlamentu Nasionál aprova ona taxa importasaun hosi 5% ba 2.5% maibé iha merkadu ka terrenu ne’e folin foos nafatin de’it no laiha mudansa.
“Ema-ne’ebé ho rendimentu boot hanesan membru Governu sira-ne’e la susar, tanba fulan-fulan ho saláriu ne’ebé boot. Kuitadu, ami povu kiik terus nafatin de’it. Tanba ne’e, dala ida tan, presiza halo kontrolu sasán sira-ne’e. Loos hanesan informasaun fó sai katak folin foos sa’e tanba ho estoke tuan nian maibé imi boot mós tenke haree ba realidade povu kiik nian iha baze,” nia hateten.
Notísia Relevante: Governu sei subsidia povu tanba folin foos iha merkadu
Jornalista : Osória Marques
Editór : Cancio Ximenes

