iklan

COVALIMA, ELEISAUN, POLÍTIKA

Kandidatu Ofisiál Supervizaun Eleisaun Covalima tuir teste eskrita prepara ba eleisaun suku

Kandidatu Ofisiál Supervizaun Eleisaun Covalima tuir teste eskrita prepara ba eleisaun suku

Diretór Komisaun Nasionál Eleisaun (CNE, sigla portugés) Covalima, Hermenegildo de Sena. Imajen Tatoli/Celestina Teles.

COVALIMA, 12  setembru 2023 (TATOLI)-Komisaun Nasionál Eleisaun (CNE,sigla portugués), munisípiu Covalima, tersa ne’e, fó ona teste eskrita ba kandidatu Ofisiál Supervizaun Eleisaun hamutuk ema 211 hodi sai fiskalizadór iha eleisaun suku ne’ebé sei hala’o iha loron 28 fulan-outubru 2023.

“Bazeia dokumentu ne’ebé kandidatura Ofisiál Supervizaun Eleisaun (OSE) na’in-211 submete sira-nia dokumentu ne’ebé ohin tuir ona teste eskrita,” Diretór CNE Munisípiu Covalima, Hermenezildo de Sena hateten ba jornalista-sira iha edifísiu CNE Tabakolot, Covalima.

Notísia Relevante :CNE realiza edukasaun sivíka ba komunidade Tilomar kona-ba eleisaun suku

Tuir oráriu CNE nian katak rezultadu teste eskrita ne’e sei públika iha loron 19 to’o 21 fulan-setembru, no kandidatu sira ne’ebé pasa iha ezame ne’e sei tuir prova entrevista ne’ebé maka ekipa rekrutamentu prepara ona.

“Iha loron 22 to’o 23 fulan-setembru tinan ne’e, ami sei fó sai rezultadu teste orál no iha loron 27 to’o 29 sei fó  formasaun durante loron tolu ami bele destaka ona Ofisiál Supervizaun Eleisaun (OSE) ne’e bá kada aldeia sei destaka ema na’in-ida,” nia dehan.

Tuir kontratu Ofisiál Supervizaun Eleisaun sira sei servisu durante fulan rua hahú outubru to’o novembru tinan ne’e.

Entertantu, CNE simu dokumentu hosi aplikante sira hamutuk 211, maibé sei rekruta de’it ema na’in-148 hodi destaka ba aldeia 148,  suku 30  hosi postu administrativu hitu munisípiu Covalima nian hanesans Fatululik, Fohorem, Fatumea, Tilomar, Maucatar, Suai no Zumalai.

Tuir dadus ne’ebé maka Agência Tatoli asesu hosi Sekretariadu Tékniku Administrasaun  Eleitorál (STAE) Covalima fó sai munisípiu Covalima iha eleitór hamutuk  49.469.

Notísia Relevante :Aplikante vaga CNE Covalima sei tuir teste iha semana oin

Jornalista: Celestina Teles

Editór: Agapito dos Santos

iklan
iklan

Leave a Reply

iklan
error: Content is protected !!