Xefe suku Maudemo enkoraja feto Covalima kompete iha eleisaun suku
COVALIMA, 12 setembru 2023 (TATOLI)–Xefe suku Maudemu, postu administrativu Tilomar, munisípiu Covalima, Maria Fátima, enkoraja feto Covalima brani atu kandidata aan ba xefe suku hodi kompete iha eleisaun suku ne’ebé sei realiza iha 28 outubru 2023.
Notísia Relevante: Suku foun 10 ne’ebé estabelese iha 2017 la partisipa eleisaun suku
“Ha’u fó motivasaun nafatin ba ha’u-nia maluk feto sira tenke brani atu kandidata aan ba kualker kargu xefe suku no xefe aldeia. Ha’u fiar katak feto sei eleita iha eleisaun suku oin mai,” Xefe Maria Fátima hateten ba Agência Tatoli iha salaun postu administrativu Suai, tersa ne’e.
Atuál xefe Suku Maudemo ne’e enkoraja feto sira tenke prepara aan no prontu atu kompete ho mane sira iha nivél foti desizaun liuhosi kandidata aan, no labele lakon oportunidade ho mane sira iha eleisaun xefe suku nian.
Munisípiu Covalima iha nia suku hamutuk 30 no hosi númeru ne’e feto na’in-ida (1) sai xefe suku iha suku Maudemo, iha postu administrativu Tilomar, munisípiu Covalima ho nia aldeia hamutuk 148 ne’e, iha feto na’in-ualu (8) mak sai xefe aldeia.
Feto Covalima ne’ebé sai xefe aldeia iha munisípiu Covalima mak hanesan iha suku Suai Loro, iha aldeia Mane Ikun, iha Suku Beco ne’e iha aldeia Tudilpo, iha suku Maudemo ne’e iha aldeia Cotau, iha suku Fatululik ne’e iha aldeia Beidasi, iha suku Laktos ne’e iha aldeia Fatuk Laran, iha suku Fohorem ne’e iha aldeia Lo’o-Hali no iha suku Raimea ne’e iha xefe aldeia feto ne’e aldeia Oebaba.
Antes ne’e, Sekretáriu Administradór Munisípiu Covalima, Francisco de Jesus Alves, enkoraja feto Covalima-oan atu kandidata aan ba xefe suku hodi konkorre iha eleisaun suku ne’e sei akontese iha fulan-outubru tinan ida-ne’e nia rohan.
Aleinde ne’e, iha loron 10 fulan-agostu tinan 2023 ne’e, Komandante PNTL Munisípiu Covalima, Superintendente Calisto Gonzaga, mós enkoraja feto sira iha Covalima atu konkore iha eleisaun suku.
Entertantu, Munisípiu Covalima ho nia postu Administrativu hamutuk hitu mak hanesan postu administrative Fatululik, Fatumea, Fohorem, Tilomar, Maucatar, Zumalai no postu administrativu Suai ho nia suku hamutuk 30 no aldeia hamutuk 148.
Notísia Relevante: “Xefe suku atuál sai pioneiru ba feto kompete iha eleisaun suku”
Jornalista : Celestina Teles
Editór : Cancio Ximenes
