OÉ-CUSSE, 13 setembru 2023 (TATOLI –Sekretáriu Rejionál ba Asuntu Terra Propriedade, António Hermenegildo da Costa informa, daudaun ne’e publikasaun kona-bá mapeamentu afetadu, ba alaergamentu estrada pakote I ne’ebé hetan afeta iha implementasaun projetu Zona Ekonómia Sosiál Merkadu Timor-Leste (ZEESM-TL), termina ona.
Nune’e iha fulan-setembru 2023 ne’e sei halo kompensasaun ba suku haat, hahú hosi suku Nípani, Costa, Cunha no Lalisuk, tanba antes ne’e publikasaun mapeamentu tau ona iha sede haat ba alargamentu estrada urbana I hosi fronteira Sakato to’o eis merkadu Tono no ponte Noefefan.
“Sekretáriu Rejionál ba Asuntu Terra Propriedade, iha semana kotuk halo tiha ona lansamentu uma afetadu sira hamutuk 36, uma tali troka ho uma fatuk, ohin pagamentu kona-bá plantasaun, ai-oan selu ho osan, no semana oin tán iha setembru nia rohan ita sei halo pagamentu ba rai, rai kompensa ho osan,” António Hermenegildo da Costa, ko’alia iha suku Taiboko, kuarta ne’e.
Notísia relevante: Autoridade publika mapeamentu suku haat prepara indemniza rai afetadu ZEESM
Tuir nia, pagamentu ba asuntu rai, autoridade sei hahú hosi suku Nipani, Costa, Cunha, Lalisuk tanba publikasaun mapa iha suku haat ne’e termina ona, entaun iha setembru nia laran ne’e hahú halo pagamentu.
“Publikasaun mapeamentu ne’e atu fó hanoin ba komunidade sira-ne’ebé afeta iha implementasaun projetu ZEESM, atubele partisipa, hatudu ba sidadaun hotu, kona-bá levantamentu kadastrál iha tinan hirak kotuk ne’e loos ka lae, karik dadus iha mapeamentu ne’e klaru ona, ita kontinua halo pagamentu,” nia hateten.
Ni informa, mapeamentu ne’e publika ba rai de’it, la inklui ai-horis, tanba autoridade RAEOA halo ona pagamentu ba plantasaun sira iha kedas 2014 to’o 2018, daudaun ne’e pagamentu ba plantasaun sira, só afeta iha 2019 mai to’o 2023.
Nune’e períodu ba mapeamentu ne’e ho tipu rua, iha loron 90 válida ba suku Costa no Nípani, kabe ba sira-ne’ebé hetan ona levantamentu hosi Sistema Nasionál Kadastru (SNC, sigla portugés) maibé seidauk halo publikasaun,
“Tán ne’e iha momentu ne’ebá ami publika, hahú hosi loron 05 juñu to’o loron 13 novembru 2023, no hosi setembru ba oin ita sei prosesa ba pagamentu,” nia katak.
Nune’e mós ba loron 30 setembru válida ba suku Cunha no Lalisuk, hahú hosi loron 05 to’o loron 15 agostu 2023.
“Razaun tanba ami iha tempu ne’ebá, programa SNC halo ona levantamentu no publika ona, maibé seidauk hetan pagamentu, entaun iha agostu ba leten ita hahú prosesa ona ba pagamentu,” nia fó-sai.
Autoridade ne’e fó sai katak, pagamentu ne’e rerere ba rezolusaun Governu númeru 20/2014, bazea rezolusaun RAEOA nian, númeru 2/2023, loron 24 fevereiru, ho valór másima, metru-kuadradu másima dollar $3,00.
“Deklarante iha 1,192, bele aumenta no bele menus tanba iha dentru publikasaun karik iha disputa ruma, ita sei la avansa ba pagamentu tanba sei iha disputa, nia orsamentu ba pagamentu, tinan kotuk iha ita prevee ona millaun $1.6,” nia informa.
Notísia relevante: RAEOA prepara ona deliberasaun paga rai afetadu ZEESM
Jornalista : Abílio Elo Nini
Editór : Evaristo Soares Martins
