Médiku timoroan na’in-48 hala’o hela estudu área Espesialista iha Cuba
DILI, 13 setembru 2023 (TATOLI)—Embaixadora Cuba iha Timor-Leste, Grisel Alina Aldama Inniss, hateten Cuba kontinua serbisu hamutuk ho Governu Timor-Leste liuhosi Ministériu Saúde (MS) haruka médiku timoroan ba hala’o estudu iha Cuba iha área espesialista.
Notísia Relevante: PR Horta-Embaixadora Cuba iha TL diskute kooperasaun iha área saúde
Nia hateten, daudaun ne’e médiku timoroan na’in-48 mak kontinua hela estudu espesialista nian iha Cuba liuliu iha área onkolójia, enfermeira iha Cuba, tuir pedidu hosi Ministériu Saúde Timor-leste nian.
“Kooperasaun bilaterál nasaun rua liuliu iha área saúde nian sei nafatin iha kooperasaun no agora audaun ne’e médiku timoroan na’in-48 mak kontinua hela estudu espesialista nian iha Cuba,” Embaixadora ne’e hateten ba jornalista sira hafoin ramata enkontru ho Prezidente Parlamentu Nasionál (PPN), Maria Fernanda Lay, iha Parlamentu Nasionál (PN), kuarta ne’e.
Durante enkontru, Embaixadora ne’e entrega karta felisitasaun hosi Prezidente Asembleia Jerál Cuba nian ba Prezidente Parlamentu Nasionál (PPN) nu’udar feto dahuluk iha Timor-Leste ne’ebé sai sai Prezidente Parlamentu Nasionál.
Liuhosi karta felisitasaun ne’e, Parlamentu Nasionál Timor-Leste hametin liutan lasu amizade no esplora kooperasaun ho Grupu amizade Parlamentu Cuba nian iha tempu oin mai.
Notísia Relevante: 2023, MS kontinua haruka médiku bá estuda área espesialidade iha Cuba
Jornalista : Nelson de Sousa
Editór : Cancio Ximenes
