STAE fó teste orál ba aplikante vaga PSAS no PSAA
MALIANA, 13 setembru 2023 (TATOLI)-Ekipa rekrutamentu hosi Sekretáriadu Tekniku Administrasaun Eleitorál (STAE) Munisípiu Bobonaro, kuarta ne’e, fó ona teste orál ba aplikante vaga Pesoál STAE Apoia Suku (PSAS) no Pesoál STAE Apoia Aldeia (PSAA) hamutuk ema 207 hodi prepara ba eleisaun suku no aldeia ne’ebé sei realiza iha loron 28 fulan-outubru 2023.
“Sira ne’e liu ona iha prosesu seleksaun dukumentu no teste eskrita iha dia 08 no ohin 13 to’o 14 ita halo prova orál,”Diretór STAE Munisípiu Bobonaro, Mariano Viegas Amarál informa ba Jornalista sira iha kna’ar fatin, kuarta ne’e.
Kandidatu vaga Pesoál STAE Apoia Suku (PSAS) hamutuk ema 72 no Pesoál STAE Apoia Aldeia (PSAA) 135, sira ne’e maihosi postu administrativu Balibó, Atabae, Maliana, Atabae, Loloto’e no Bobonaro.
Nia hateten kandidatu vaga Pesoál STAE Apoia Aldeia (PSAA) ninia númeru aplikante daudaun ne’e la to’o númeru ne’ebé STAE propoin, tanba tuir loloos STAE persiza ema na’in 193 maibé aplikante ema 135 de’it.
Ho situasaun ne’e maka STAE munisípiu Bobonaro relata ona ba Diresaun Jerál STAE no Diresaun Jerál husu atu STAE munisípiu koordena ho administradór postu, xefe suku sira hodi delega ninia reprezentante hosi aldeia sira atu aplika vaga ne’e iha tempu badak nune’e bele priense númeru ne’ebé maka iha.
“Sira tenke indika Pesoál STAE Apoiu Aldeia mai iha STAE mak STAE sei halo prova eskrita ho orál dala ida depois remata ida ne’e ita sei fó formasaun ba sira atu apoia aktividade eleisaun liuliu ba aprezentasaun kandidatu,”Nia hateten.
Diretór STAE munisípiu fronteira ne’e husu ba kandidatu sira ne’ebé maka sei pasa iha vaga ne’e atu servisu ho profesionál no imparsialidade bainhira realiza eleisaun suku no aldeia iha fulan-oin.
Iha tempu hanesan aplikante vaga PSAS hosi suku Balibo, Melquior Tavares Yohanes, orgullu tanba bele partisipa prova orál ne’e ho di’ak no prontu atu simu rezultadu prova ne’e lakon ka manán.
“Karik ha’u liu ha’u prontu servisu ho di’ak ba eleisaun suku hodi bele aumenta ha’u nia esperiénsia para bele preparan aan kompete fali iha eleisaun sira tuirmai,”Nia dehan.
Entretantu, iha eleisaun suku tinan ne’e STAE Munisípiu Bobonaro presiza PSAS ema 50 hodi koloka bá kada suku no PSAA na’in 193 hodi koloka kada sentru votasaun estabelesidu iha aldeia.
Notísia Relevante:STAE Bobonaro hahú rekruta PSAS-PSAA
Jornalista: Sergio da Cruz
Editór: Agapito dos Santos
