DILI, 15 setembru 2023 (TATOLI)—Prezidente Parlamentu Nasionál, Maria Fernanda Lay, hateten sei aprezenta inisiativa hodi altera lei pensaun vitalísia.
Notísia Relevante: Madre Guilhermina fó hanoin PN altera lei pensaun vitalísia
“Ami sei hatama duni inisiativa. Pensaun vitalísia ne’e labele halakon totál. Halakon pensaun vitalísia ba sira-ne’ebé mai oin nian, ba kotuk ninian ne’e direitu adkíridu tuir konstituisaun labele halakon,” Prezidente PN ne’e hateten ba jornalista sira iha uma fukun PN, sesta ne’e.
PN iha lejislatura daneen sei fó prioridade aprezenta inisiativa altera pensaun vitalísia, maibé sei haree mós lei importante seluk hafoin aprezenta inisiativa altera lei pensaun vitalísia.
“Ami sei tau iha prioridade (altera lei pensaun vitalísia), maibé tuir ita-boot sira hatene Governu rasik ko’alia liga ho lei lubun ida-ne’ebé Parlamentu aprova ita tenke armoniza. Ida, ha’u hatene Lei Enkuadramentu Orsamentál (LEO) ne’ebé Tribunál Rekursu mós hateten lei iha artigu balun inkonstituisionál, ita tenke kurije,” nia dehan.
Antes ne’e, Xefe Bankada CNRT iha Parlamentu Nasionál, Deputadu Duarte Nunes, hateten sei aprezenta inisiativa hodi altera lei pensaun vitalísia, tanba inisiativa ida-ne’e sai mós priroridade iha kompromisu loron 120 nian.
Notísia Relevante: Loron 120: CNRT prioriza sei aprezenta inisiativa altera lei pensaun vitalísia
“Seidauk, tanba komisaun sira-ne’e foin mak estabelese no ami hein Governu halo inisiativa lori mai, ami avansa. Parlamentu bele iha inisiativa no bele mós Governu depende, tanba agora Parlamentu kuaze CNRT mak maiória ne’ebé ami sei ko’alia ba malu ho Governu ida-ne’ebé mak iha ona. Se parte sosiál (Ministériu Solidariedade Sosiál no Inkluzaun) prontu ona avansa proposta ruma, entaun sira konkorda ami mós subskreve,” Xefe bankada CNRT ne’e hateten.
Nia hatutan, alterasaun ne’e nafatin hanesan ho inisiativa ne’ebé uluk diskute ona iha lejislatura dalimak altera lei pensaun vitalísia hodi integra ba seguransa sosiál, maibé la konsege finaliza no to’o agora kaduka hela.
Tanba ne’e, importante inisiativa lei ne’e mai atu substitui pensaun vitalísia hodi integra ba seguransa sosiál, maibé sei iha diskusaun bele iha mudansa maibé nia objetivu prinsípál atu integra ba seguransa sosiál.
“Loron 120 la signifika tenke aprova hotu, hanesan horibainhira Primeiru-Ministru dehan, tenke book buat ruma iha ne’eba hahú ona inisiativa iha ona, iha loron 120 nia laran ne’e,” nia hateten.
Notísia Relevante:Deputadu maiória lakohi altera lei pensaun vitalísia
Jornalista : Nelson de Sousa
Editór : Cancio Ximenes
