Bernard Harbone hasoru Xanana Gusmão hodi hatene vizaun no misaun governasaun
DILI, 18 setembru 2023 (TATOLI)–Reprezentante Banku Mundiál iha Timor-Leste, Bernard Harbone, segunda ne’e, hasoru malu ho Primeiru-Ministru, Kay Rala Xanana Gusmão hodi ko’alia kona-ba vizaun no misaun Governasaun dasia nian.
“Ha’u mai hasoru malu ho Primeiru-Ministru, Xanana Gusmão hodi ko’alia kona-ba vizaun no misaun Governu ida ne’e nian ba oin tanba Banku Mundiál nu’udar parseiru ne’ebé kle’ur ona ho Governu Timor-Leste no Xanana presiza liu enkoraza no kritíku duke osan,” dehan Bernard ba jornalista-sira iha Palásiu Governu, segunda ne’e.
Notísia Relevante :Banku Mundiál rekomenda Timor-Leste foku ba diversifikasaun ekonómika
Iha enkontru ne’e, Xefe Governu, Xanana Gusmão husu ba Reprezentasaun Banku Mundiál ne’e, atu servisu hamutuk ho parseiru dezenvolvimentu sira seluk tan ne’ebé hala’o misaun iha Timor-Leste atu oinsá apoiu governu hodi diversifka ekonomia rai-laran no setór sosiál sira seluk tan.
“Ami kontente tebes tanba iha enkontru ne’e hatudu rezultadu di’ak tanba ami bele servisu hamutuk ho governu ida ne’e ba oin,” nia hateten.
Hosi kooperasaun servisu entre Banku Mundiál ho Governu Timor-Leste nian implementa ona projetu boot neen ba dezenvolvimentu ne’ebé foku iha aréa edukasaun, agrikultura, bee moos, saneamentu, estrada no saúde.
Entertantu, tuir relatóriu katak to’o oras ne’e, Banku Mundiál fó ona empréstimu ba Governu Timor-Leste ho orsamentu hamutuk millaun $300 ho ninia jurus ne’ebé kiik ho durasaun atu selu fila fali durante tinan 40.
Notísia Relevante :Banku Mundiál sei fó empréstimu millaun $50 ba TL hodi harii ospitál tolu
Jornalista: Hortencio Sanchez
Editór : Agapito dos Santos
