DILI, 18 setembru 2023 (TATOLI)–Embaixadór Nova Zelándia iha Timor-Leste, Philip Hewitt, kompromete atu kontinua apoiu Timor-Leste ninia diversifikasaun ekonomia hodi aselera prosesu dezenvolvimentu nasaun ne’e iha futuru.
“Timor-Leste ho Nova Zelándia parseiru ne’ebé metin tebes ona, ne’e mak ha’u mai ko’alia ho Vise-Primeiru Ministru, Mariano Assanami Sabino, oinsá Timor-Leste ho Nova Zelándia bele servisu hamutuk iha diversifikasaun ekonomia iha aréa oioin ne’ebé Timor-Leste presiza ami-nia tulun,” dehan Diplomata ne’e ba jornalista-sira iha Palásiu Governu, segunda ne’e.
Notísia Relevante :MNEK-Nova Zelándia diskute kooperasaun iha área turizmu-alterasaun klimátika
Nia esplika aréa edukasaun, seguransa, setór turizmu, agrikultura no seluk tan maka sai tópiku importante ne’ebé maka ohin parte rua diskute iha sorumutu ne’e hodi implementa ba oin.
Iha aréa agrikultura nian, Nova Zelándia servisu hamutuk ona ho Klínika Kafé Timor atu oinsá aumenta produsaun no hasa’e kualidade kafé Timor-Leste.
“Iha parte edukasaun nian ami servisu ho Ministru Edukasaun kona-ba oinsá ajuda bolsa estudu ba Timoroan sira, iha seguransa nian ami servisu hamutuk ho Polisia Nasionál Timor-Leste (PNTL) hodi fó seguransa ba komunidade sira,” nia relata.
Entertantu, antes ne’e, iha mandatu Governu Konstitusionál daualu, Eis Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, asina ona deklarasaun ho omólogu, Ministra Negósiu Estranjeiru Nova Zelándia, Hon Nanaia Mahuta kona-ba parséria entre Timor-Leste ho Nova Zelándia.
Ho deklarasaun ida-ne’e, nasaun rua sei estabelese prinsipiu hirak ne’ebé parte rua partilla, prioridade no entendimentu sira ne’ebé sei orienta kooperasaun no envolvimentu iha área prinsipal lima maka hanesan kooperasaun multilaterál no rejionál, dezenvolvimentu sustentavel inkluzivu, komérsiu no kooperasaun ekonómika, hametin relasaun entre ema-ba-ema no relasaun entre governu ho benefísiu mútuo.
Notísia Relevante :MEJD no Embaixadór Nova Zelándia asina akordu kooperasaun programa eskola iha uma
Jornalista: Hortencio Sanchez
Editór : Agapito dos Santos
