VIQUEQUE, 19 setembru 2023 (TATOLI)—Entidade hosi Centru Nasionál Chega! Institutu Públiku (CNC, I.P) no autoridade munisípiu Viqueque, iha tersa ne’e, diskute posibilidade estabelese muzeu munisipál hodi akumula arkivu rezisténsia hodi públiku bele asesu istória pasadu Timor-Leste.
“Ohin halo diskusaun ho CNC hodi haree, sentru ne’e tau iha munisípiu hodi sai sentru ba postu lima nia klaran, atu nune’e ema bele asesu hotu, karik ema ne’ebé hakarak bá Kararas sira bele bá direta, maibé sentru ne’e tenke iha munisípiu,” Prezidente muzeu memoriál no atuál Administradór munisípiu Viqueque, Januário Soares ‘Bolly’, hateten hafoin halo diskusaun iha salaun administrasaun Viqueque.
Notísia relevante : CNC, I.P lansa Muzeu Memoriál iha Viqueque
Daudaun ne’e iha ona muzeu rezisténsia maibé lokaliza iha Kararas ho distánsia dook.
Iha fatin hanesan, Xefe Departamentu Arkivu Istóriku CNC, I.P, Aventino de J.B. Ximenes, haktuir, parte rua iha hanoin harii muzeu munisipál ho hanoin ba sustentablidade no asesiblidade.
Iha tinan 2021 estabelese ona muzeu memoriál ida iha suku Bibileo, Kararas ne’ebé CNC kontinua fó apoia liu-liu fortalesementu instituisionál. Daudaun kontinua asegura funsionamentu muzeu nune’e bele la’o ho di’ak.
“Ha’u hanoin estabelese muzeu munisipál maka atu halo prezervasaun ba memória istóriku hosi tinan 1974 to’o 1999. Objetivu atu estabelese muzeu ne’e hodi halo prezervasaun memória no koleksaun istória pasadu sira ne’ebé maka iha nível munisípiu Viqueque, nune’e bainhira ita hakerek istória ruma bele valoriza vítima sira ne’ebé kontribui ba luta libertasaun,” nia hato’o.
Muzeu memoriál munisipál mós sei sai sentru ba apreende istória pasadu no violasaun diretu umanu.
Diskusaun ne’e partisipa mós hosi diretór liña ministeriál, autoridade komunitária, Veteranu hosi munisípiu Viqueque inklui ekipa CNC, I.P.
Jornalista : Vitorino Lopes da Costa
Editora : Julia Chatarina
