Dili, 19 setembru 2023 (TATOLI)–Governu Konstitusionál dasiak, segunda ne’e hamutuk ho parseiru dezenvolvimentu sira halo diskusaun kona-ba polítika atu oinsá rezolve problema má-nutrisaun tanba tuir dadus Timor-Leste okupa pursentu 47 iha mundu.
Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, maka lidera enkontru ho reprezentante parseiru dezenvolvimentu sira hanesan JICA, UNICEF, Banku Mundál, KOICA, UE, UNFPA, UNDP, WFP, FAO, WHO, ADB, no IFC iha Palásiu Governu Dili.
Notísia Relevante :2022: labarik tinan lima mai kraik sofre má nutrisaun iha TL hamutuk 2.478
“Enkontru importante ida ho parseiru hotu-hotu ne’ebé mak hala’o servisu hamutuk liu-liu ba má-nutrisaun hanesan hotu-hotu hatene katak Prezidente Repúblika, José Ramos Horta apela no orienta oinsá salva labarik sira,” Assanami hateten iha Palásiu Governu.
Tuir Assanami katak liña koordenasaun sei sai dezafiu ne’ebé maka mosu durante ne’e, tanba la fasil atu halo koordenasaun hosi nasionál to’o iha área rurál. Tanba ne’e, ho enkontru ohin ho konkluzaun ida sei hamosu ekipa Task Force ida ba dezenvolvimentu kapitál, sosiál no hamosu mós stering Comitte ida atu sinkroniza, harmoniza no monitoriza servisu sira ne’e.
“Ohin ita fó ona responsabilidade ba ajénsia tolu hanesan WFP, Banku Mundiál no UNICEF, hodi formula planu no programa atu nune’e steering Comitte sira bele halo servisu hamutuk ho di’ak,”Vise Primeiru-Ministru ne’e relata.
Durante enkontru koordenasaun ne’e,Assanami relata, hosi parte governu relata mós kona-ba situasaun jovens sira-nian liga ho kampu servisu, saúde, edukasaun no problema sosiál seluk tan ne’ebé maka governu ho parseiru dezenvolvimentu sira atu servisu hamutuk hodi rezolve.
“Liga ba isue sira ne’e, ohin ba oin, ita presiza enkontru koordenada hodi sinkroniza no harmoniza planu no programa sira atu ita hatene, se mak halo saida, se mak halo ho se, apoiu iha ne’ebé, atu ita asaun ida, hodi monitoriza no avalia nia rezultadu,” Assanami hatutan.
Entertantu, tuir dadus peskiza estunting ba tinan 2020, iha territóriu nasionál, Timor-Leste iha 47.1%, aas liu mak 63.4% iha munisípiu Ermera, 60.3% Ainaro no 57.1% Oecusse.
Notísia Relevante :Ministériu Saúde rekoñese Timor-Leste seidauk redús taxa má nutrisaun
Jornalista: Hortencio Sanchez
Editór : Agapito dos Santos
