Governu nomea Virgílio Smith ba Prezidente Autoridade Turizmu Timor-Leste
DILI, 19 setembru 2023 (TATOLI)—Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, aprezenta projetu rezolusaun kona-ba nomeasaun jerente Autoridade Turizmu Timor-Leste, Institutu Públiku (ATTL, I.P) iha reuniaun Konsellu Ministru, ne’ebé hetan ona aprovasaun.
“Rezolusaun Governu ne’e hodi nomea Virgílio Smith ba kargu Prezidente Konsellu Diretivu ba Autoridade Turizmu Timor-Leste no Ildefonso de Carvalho ba kargu Vogál Konsellu,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu, tersa ne’e.
Notísia relevante : Austrália promete apoia Timor-Leste iha turizmu no ekonomia
Kargu Prezidente Konsellu Diretivu no Vogál ne’e ba mandatu tinan-haat, ne’ebé Governu rekoñese entidade hirak ne’e ninia kompeténsia téknika no aptidaun hodi hala’o funsaun.
Vírgilio Smith antes ne’e asume kargu nu’udar Sekretáriu Estadu Rejiaun II, Ministru Estadu Kultura, Vise-Ministru Ensinu Báziku no Sekundáriu, no ikus liu nu’udar Ministru Asuntu Kombatente Libertasaun Nasionál.
Jornalista : Antónia Gusmão
Editora : Julia Chatarina
