DILI, 03 agostu 2023 (TATOLI)--Enkarregada Negósiu Austrália ba Timor-Leste, Caitlin Wilson hateten, Governu Austrália sei kontinua servisu hamutuk ho IX Governu hodi fó apoia iha formasaun aumenta no hasa’e kapasidade ba orsamentu no planeamentu iha área turizmu.
“Austrália apoia Timor-Leste ba adezaun ASEAN inklui Organizasaun Mundiál ba Komersiu no ajuda iha área turizmu nian. Realiza formasaun atu hasa’e kapasidade orsamentu no planeamentu ba turizmu inklui formasaun hasa’e negósiu,” Caitlin Wilson, hateten iha Gabinete Ministru Turizmu no Ambiente, kinta ne’e.
Notísia relevante : MDF-HOTL selebra akordu dezenvolve setór turizmu iha Timor-Leste
Lia hirak ne’e hoto’o bainhira Enkarregada Negósiu Austrália akompaña hosi Segundu Sekretária ba Asuntu Polítika, Glenn Maloney, no Terseiru Sekretária ba Asuntu Governasaun, Elise Schuster hasoru malu ona ho Vise Primeiru-Ministru, Ministru Koordenadór ba asuntu Ekonómiku, Ministru Turizmu no Ambiente, Francisco Kalbuadi Lay.
Maski Canberra oras ne’e seidauk nomea diplomata ka embaixadór ida mai Timor-Leste maibé, iha kompromisu atu servisu hamutuk ho Timor-Leste.
Durante hasoru malu, reprezentante Governu Austrália ba dahuluk kongratula Ministru Francisco Kalbuadi Lay, ba kargu sira ne’ebé oras ne’e nia asume hela iha estrutura IX Governu, inklui ko’alia kona-ba asuntu ekonomia tanba país rua iha kooperasaun di’ak.
Biban ne’e, Ministru Francisco Kalbuadi Lay agradese tebes ba vizita ne’e no ba kompromisu Governu Austrália ne’ebé hakarak kontinua apoiu governasaun foun ne’e iha área oin-oin inklui turizmu no ekonomia.
“Australia la’ós foin mak ajuda ita maibé ajuda ita kleur ona. Depois iha tinan 2002 Austrália fó apoia ba área hotu. Iha hasoru malu ne’e ami kontinua diskute saida mak Austrália atu kontinua halo iha Timor,” governante ne’e akresenta.
Jornalista : Antónia Gusmão
Editora : Julia Chatarina
