Auotoridade RAEOA rejeita Kuarentena Mahata abandona
OÉ-CUSSE, 20 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, klarifika kona-bá funsionamentu kuarentena Mahata ne’ebé konstrui iha tempu COVID-19, daudaun ne’e la’ós abandona maibé uza ba fatin rezerva bainhira iha situasaun emerjénsia hatama mós iha Planu Asaun Anuál 2024 nian.
Arsénio Bano ko’alia asuntu ne’e hodi responde ba Parlamentu Nasionál (PN) hosi Komisaun C trata asuntu Finansa Públika, hala’o fiskalizasaun ba projetu sira iha Oé-Cusse, deskobre, kuarentena Mahata abandona.
Notísia relevante: Komisaun C fó hanoin ba Autoridade RAEOA “labele abandona kuarentena Mahata”
“Kuarentena Mahata, ita-nia planu prioridade iha ona, ita bele haree ba tinan oin, membru autoridade iha ona polítika, la’ós abandona, durante ne’e ita uza ba fatin rezerva, maibé planu ba tinan oin, kontinua uza fatin rezerva ba situasaun emerjénsia rejiaun nian, no sei servi RAEOA bainhira presiza atividade rejiaun iha área sosiál, desportu, kultura no ekonomia,” Arsénio Bano ba jornalista sira iha Usitasa’e, kuarta ne’e.
Durante ne’e Autoridade RAEOA kontrola liuhosi Sekretária Finansa hamutk ho Diresaun Obra Públika, nune’e mós iha segurAnsa atu asegura no haree fatin moos.
“Maibé ita-nia servisu barak kontinua la’o ona, hanesan estrada gabiaun no servisu seluk tán, sá tán ba ekipamentu, tÁn ne’e maka kuarentena sei haree, maibé ne’e planu ba 2024, agora ita halo hela preparativu ba planu 2024 nian,” nia klarifika.
Nia informa, Oé-Cusse labele atraza liu, tanba Oé-Cusse ne’e, haleu hosi NTT, rai viziñu dezenvolvimentu la’o maka’as, TTU, Kupang dezenvolvimentu la’o maka’as, Oé-Cusse tenke la’o maka’as, entaun labele halimár barakliu, tenki kontinua servisu.
Entretantu, kuarentena ne’e konstrui iha Portu Iwao Kitahara Mahata iha 2021 bainhira tempu COVID-19, konstrui hosi kompañia lokál Lifau Indah Unipesoál Lda, ho kustu $407.000, kuarentena ne’e fahe ba uma tolu, kada uma ida nia medida naruk metru 51, no nia luan metru 10 ho totál kuartu 84.
Notísia relevante: Vise-MNEK ho PA RAEOA inaugura kuarentena iha Pante Makasar
Jornalista: Abílio Elo Nini
Editór: Evaristo Soares Martins
