iklan

EKONOMIA, HEADLINE, MUNISÍPIU, OÉ-CUSSE (RAEOA)

Komisaun C fó hanoin ba Autoridade RAEOA “labele abandona kuarentena Mahata”

Komisaun C fó hanoin ba Autoridade RAEOA “labele abandona kuarentena Mahata”

Komisaun C ne’ebé trata asuntu Finansa Públika, sesta nee hala’o fiskalizasaun polítika ba kuarentena Mahata, Oe-Cusse. Imajen Tatoli/ Abilio Elo Nini.

OÉ-CUSSE 15 setembru 2023 (TATOLI – Parlamentu Nasionál (PN) liuhosi Komisaun C ne’ebé trata asuntu Finansa Públika, fó hanoin ba Autoridade Rejiaun Administrativa Espsiál Oé-Cusse Ambeno (RAEOA), atu labele abondona edifísiu kuarentena Mahata maibé bele kria polítika ho estratéjia hodi buka osan hatama ba kofre Estadu.

Prezidente Komisaun C, Deputada Cedelízia dos Santos, hateten, uma tolu ne’e autoridade RAEOA harii iha pandemia COVID-19 2021, atu halo ba kuarentena maibé hafoin tama ba situsaun normál, uma hirak-ne’e abandona tiha.

“Ohin komisaun C kontinua mai halo fiskalizasaun iha kuarentena ne’e, ami nota iha-ne’e katak, orsamentu ne’ebé mak sira (RAEOA) gasta hosi harii uma kuarentena ne’e, ho montante rihun $400-resin ne’ebá maka la’os foti hosi osan fundu COVID-19 ne’ebé mak aloka mai, maibé foti hosi OJE RAEOA nian rasik,” Prezidente Komisaun C, Deputada Cedelizia dos Santos, ba jornalista sira hafoin halo fiskalizasauniha iha portu Mahata, Oé-Cusse, sesta ne’e.

Notísia relevante: Konstrusaun fíziku kuarentena Portu Mahata atinje ona 65%

Tuir deputada ne’e katak, hafoin pandemia COVID-19 laiha ona, uma hirak-ne’e, abandona hela de’it nune’e, maibé autoridade gasta tiha osan ne’e, Governu lokál laiha polítika ida oinsá bele uza fali uma hirak-ne’e, ho sasán ne’ebé iha atubele hatama fali retornu ba kofre Estadu.

“Tanba ita gasta tiha ona osan, depois uma ho sasán sira-ne’e, husik de’it, ha’u hanoin, ne’e ita gasta osan Estadu saugati de’it, ita mós presiza reseita, ho maneira oinsa mak ita halo hodi hatama fali osan ba kofre RAEOA rasik,” nia husu.

Tuir nia, fasilidade hirak-ne’e, oportunidade di’ak, maibé konforme Autoridade sira-nia planu no jestaun ba futuru, atu uza halo oinsá.

“Ami rona katak, foin daudaun ne’e ema mai hosi Indonézia, mai hala’o jogu amizade iha-ne’e, depois sira mai toba iha fatin ne’e, maibé toba gratuita de’it, sé ita ba ema-nia rai, ita toba selu, maske osan la barak dollar $5 mós sufisiénte ona atu hatama ba kofre Estadu, nune’e Governu bele jere ida-ne’e,” nia katak.

Entretantu, kuarentena ne’e konstrui iha Portu Iwao Kitahara, Mahata iha 2021 bainhira tempu COVID-19, konstrui hosi kompañia lokál Lifau Indah Unipesoál Lda, ho kustu rihun $407, kuarentena ne’e fahe ba uma tolu, kada uma ida nia médida naruk metru 51, no nia luan metru 10.

Notísia relevante: Vise-MNEK ho PA RAEOA inaugura kuarentena iha Pante Makasar

Jornalista   : Abílio Elo Nini

Editór          : Evaristo Soares Martins

iklan
iklan

Leave a Reply

iklan
error: Content is protected !!