DILI, 20 setembru 2023 (TATOLI)—Prezidente Parlamentu Nasionál (PPN), Maria Fernanda Lay, kuarta ne’e, simu audiénsia Reprezentante UNICEF iha Timor-Leste, Bilal Aurang Zeb Durani, hodi diskute problema mortalidade no má nutrisaun ba labarik sira iha Timor-Leste.
Notísia Relevante: TL sei foka problema má-nutrisaun no stunting iha asembleia jerál ONU ba dala 77
“Ohin, ami ko’alia kona-ba kestaun labarik nian iha Timor-Leste, hanesan iroblema mortalidade ba labarik sira no má nutrisaun ne’ebé Timor-Leste aas tebes iha globalmente. Entaun, husu apoiu ba PN oinsá mak bele apoia UNICEF entermu ministériu sira, oinsá atu bele serbisu hamutuk kombate situasaun labarik nian,” Reprezentante UNICEF, Bilal Aurang Zeb Durani, hateten ba jornalista sira hafoin ramata enkontru iha uma fukun PN.
Nia dehan, tuir estudu barak ne’ebé halo kona-ba taxa mortalidade labarik no má nutrisaun riha Timor-Leste ne’e, ejista ho númeru aas iha Ermera no Óe-Cusse (RAEOA),
“Entaun, ho situasaun ne’e ita bele halo mudansa hahalok inan sira-nian, ne’ebé ita hatene iha 57% inan sira laiha prátika hahalok di’ak, entermu labarik sira moris mai sira la fó susu been inan nian ba labarik. Nune’e, ida-ne’e hanesan fatór ida kontribui má nutrisaun no mortalidade labarik,” nia dehan.
Governu ho parseiru sira serbisu hamutuk atu kombate no Governu liuhosi Vise Primeiru-Ministru ba asuntu Sosiál, Mariano Asanami Sabino, loron hirak liu ba fó sai ona nia kompromisu atu estabelese steering committee ne’ebé serbisu foka ba estratéjia dezenvolvimentu labarik nian hodi responde ba problema labarik nian iha nasaun ne’e.
“Nune’e, Prezidente PN nia apoiu no garante oinsá mak serbisu hamutuk bele redús mortalidade no má nutrisaun labarik sira-nian,” nia hateten.
Reprezentante UNCEF ne’e heteten, UNICEF mós iha kompromisu kontinua apoiu dezenvolvimentu edukasaun iha nasaun ne’e, liuliu ba labarik sira no hasa’e kualidade manorin na’in no infraestrutura, nune’e serbisu hamutuk ho Ministériu Edukasaun (ME) atu bele garante kualidade aprendizajen ba labarik sira.
“Iha de’it númeru 27% ba ita-nia labarik iha Timor-Leste ne’ebé asesu ba iha eskola pre-eskolár, entaun hirak ne’ebé la asesu ne’e sira seidauk iha preparasaun ne’ebé mak di’ak tama iha prosesu aprendizajen ba iha eskola primária. Kualidade manorin sira no infraestrutura ne’ebé adekuadu ba labarik sira atu fasilita prosesu aprendizajen, entaun planu estratéjia ME nian ba tinan lima oin mai foka ba asuntu refere no UNICEF serbisu hamutuk nafatin ho Governu oinsá alkansa objetivu ida-ne’e,” nia dehan.
Notísia Relevante: UN–UNICEF no PAM atualiza dadus seguransa ai-han nutrisaun ba Media TL
Jornalista : Nelson de Sousa
Editór : Cancio Ximenes
